Dyn yn ymddangos yn y llys wedi marwolaeth Fairbourne

Thomas Bryan (dde) yn cyrraedd Llys Ynadon Llandudno ddydd Llun

Mae dyn 75 oed o dde Gwynedd wedi ymddangos yn y llys am y tro cyntaf ers cael ei gyhuddo o lofruddio ei wraig.

Bu farw Vivienne Bryan, 74, mewn eiddo yn Rhodfa Francis yn Fairbourne ddydd Nadolig.

Cafodd Thomas Bryan ei gadw yn y ddalfa wedi'r gwrandawiad a barodd ddau funud yn Llys Ynadon Llandudno ddydd Llun.

Bydd yn ymddangos o flaen Llys Y Goron Yr Wyddgrug ddydd Mawrth.

Cafodd y gwasanaethau brys eu galw i'r stryd toc wedi 20:00 ar 25 Rhagfyr yn dilyn adroddiadau fod dynes wedi dioddef anafiadau difrifol.

Bu farw yn y fan a'r lle, er gwaethaf ymdrechion parafeddygon i'w hadfywio.