Record newydd yn cael ei osod ar gyfer Hanner Marathon Caerdydd

Yismaw Dillu yn croesi'r linell ac yn torri record y dynion ar gyfer Hanner Marathon Caerdydd

Wrth i filoedd gymryd rhan yn ras Hanner Marathon Caerdydd ddydd Sul gyda thorfeydd enfawr drwy gydol y brifddinas mae record newydd wedi ei osod.

Cafodd ras elît y dynion ei hennill gan Yismaw Dillu, 20 o Ethiopia, a gwblhaodd y cwrs mewn 59 munud 23 eiliad - sy'n curo'r hen record gan 7 eiliad.

Miriam Chebet, 23 o Kenya, enillodd ras elît y merched, a hynny mewn 1 awr, 6 munud a 37 eiliad.

A Callum Hall o Sir Durham enillodd y ras cadair olwyn gydag amser o 53 munud 46 eiliad.

Roedd disgwyl y nifer fwyaf erioed o redwyr i gymryd rhan eleni

Roedd disgwyl y nifer fwyaf erioed o redwyr i gymryd rhan yn y ras 13.1 milltir ddydd Sul.

Cafodd nifer fawr o ffyrdd eu cau ar draws y brifddinas wrth i'r ras ddechrau ar Stryd y Castell am 10:00.

Roedd amrywiaeth o DJs, bandiau a chorau yn perfformio ar hyd y cwrs er mwyn darparu adloniant i'r rhedwyr a'r cefnogwyr.

Mae poblogrwydd y ras yn mynd o nerth i nerth - eleni fe werthodd y tocynnau i gyd o fewn 12 awr - ac am y tro cyntaf y flwyddyn nesaf mi fydd system balot yn cael ei defnyddio.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.