Nick Tompkins yn dechrau i Gymru i herio Iwerddon

Fe sgoriodd Nick Tompkins gais ar ei ymddangosiad cyntaf i Gymru yn erbyn Yr Eidal

Bydd canolwr Saracens, Nick Tompkins yn dechrau ei gêm gyntaf i Gymru yn erbyn Iwerddon ym Mhencampwriaeth y Chwe Gwlad ddydd Sadwrn.

Fe wnaeth Tompkins greu argraff ar ei ymddangosiad cyntaf dros Gymru yn y fuddugoliaeth dros Yr Eidal y penwythnos diwethaf, gan sgorio cais.

Bydd yn rhaid i'r asgellwr, Johnny McNicholl, fodloni am le ar y fainc, wrth i George North symud o'r canol i'r asgell.

Dyna'r unig newid yn y 15 sy'n dechrau, ond mae nifer o newidiadau ar y fainc.

Mae'r prop Rhys Carré yn cymryd lle Rob Evans tra bod Cory Hill yn colli ei le i Adam Beard oherwydd anaf.

Ymysg yr olwyr ar y fainc mae Gareth Davies wedi'i ddewis o flaen Rhys Webb ac Owen Williams yn cymryd lle Jarrod Evans.

Dywedodd Wayne Pivac bod Tompkins wedi perfformio'n "arbennig" yn erbyn Yr Eidal

Mae rhybudd am dywydd garw mewn grym yng Nghymru ac Iwerddon dros y penwythnos, gyda phryder y gallai hynny effeithio ar drefniadau teithio cefnogwyr o Ddulyn.

Fe wnaeth Iwerddon gyhoeddi eu tîm ddydd Mercher, gyda'r prif hyfforddwr Andy Farrell yn gorfod gwneud dau newid o'r tîm drechodd Yr Alban oherwydd anafiadau.

Bydd y canolwr Robbie Henshaw yn cymryd lle Garry Ringrose, tra bod Peter O'Mahony yn dechrau yn y rheng-ôl yn lle Caelan Doris.

Tîm Cymru

Leigh Halfpenny; George North, Nick Tompkins, Hadleigh Parkes, Josh Adams; Dan Biggar, Tomos Williams; Wyn Jones, Ken Owens, Dillon Lewis, Jake Ball, Alun Wyn Jones (capt), Aaron Wainwright, Justin Tipuric, Taulupe Faletau.

Eilyddion: Ryan Elias, Rhys Carré, Leon Brown, Adam Beard, Ross Moriarty, Gareth Davies, Owen Williams, Johnny McNicholl.

Tîm Iwerddon

Jordan Larmour; Andrew Conway, Robbie Henshaw, Bundee Aki, Jacob Stockdale; Jonathan Sexton (capt), Conor Murray; Cian Healy, Rob Herring, Tadhg Furlong, Iain Henderson, James Ryan, Peter O'Mahony, Josh van der Flier, CJ Stander.

Eilyddion: Ronan Kelleher, Dave Kilcoyne, Andrew Porter, Devin Toner, Max Deegan, John Cooney, Ross Byrne, Keith Earls.

Amserlen y gemau

Sadwrn 1 Chwefror, 14:15 - Cymru 42-0 Yr Eidal

Sadwrn 8 Chwefror, 14:15 - Iwerddon v Cymru

Sadwrn 22 Chwefror, 16:45 - Cymru v Ffrainc

Sadwrn 7 Mawrth, 16:45 - Lloegr v Cymru

Sadwrn 14 Mawrth, 14:15 - Cymru v Yr Alban