Gwahardd chwaraewr rygbi am sylw hiliol

Daeth yr honiadau'n dilyn gêm yn Llanrhymni ar 4 Ionawr

Mae chwaraewr rygbi wedi cael ei wahardd am wyth wythnos wedi iddo wneud sylw hiliol yn erbyn gwrthwynebydd yn ystod gêm ar ddechrau'r flwyddyn.

Daeth y gêm rhwng Llanrhymni a Threfil i ben yn gynnar yn dilyn y digwyddiad yng Nghaerdydd ar 4 Ionawr.

Roedd clwb Llanrhymni wedi honni bod eu canolwr Wayne Dacruz wedi cael ei gam-drin yn hiliol.

Dywedodd datganiad gan Undeb Rygbi Cymru: "Nid oes lle i gamdriniaeth o unrhyw fath yn rygbi'r undeb."

Cardiau coch

Cafwyd tri cherdyn coch yn ystod yr ornest Cynghrair 3 Canol Dwyrain C ar dir chwarae Neuadd Llanrhymni yn y brifddinas.

Daeth panel yr Undeb i'r casgliad fod gweithred y chwaraewr yn haeddu gwaharddiad o 12 wythnos, gyda gostyngiad o bedair wythnos o achos nifer o ffactorau.

Roedd rhain yn cynnwys tystiolaeth fod yr ymddygiad wedi dod "ar ôl i'r chwaraewr gael ei bryfocio'n sylweddol", ac nid oedd yr ymddygiad yn cydfynd â chymeriad y chwaraewr, a'r ffaith fod ganddo record dda o ddisgyblaeth dros gyfnod o 20 mlynedd o chwarae.

Bydd y chwaraewr yn cael dychwelyd i'r gamp ar 23 Mawrth.