Pryder fod morfil aeth i drafferthion wedi marw

Mae'n ymddangos fod llo morfil ifanc aeth i drafferthion yn aber yr afon Dyfrdwy dros y penwythnos wedi marw.

Aeth i drafferthion yn aber yr afon am y tro cyntaf ddydd Gwener, cyn mynd yn sownd yn yr un lleoliad eto ddydd Sadwrn.

Roedd na obaith fod y morfil 30 troedfedd o hyd wedi dychwelyd i'r môr pan welwyd o'n nofio yno bnawn ddoe.

Ond erbyn bore dydd Sul fe gafwyd hyd i'r anifail yn ddiymadferth a dim arwydd ei fod yn fyw.

Y gred yw mai dim ond chwech neu saith mis oed oedd y llo morfil, ac roedd swyddogion o elusen British Divers Marine Life Rescue (BDMLR) wedi bod yn asesu ei gyflwr yn gyson.

Mewn datganiad fore dydd Sul, dywedodd yr elusen fod y morfil wedi mynd yn sownd eto nos Sadwrn ar aber yr afon Dyfrdwy ond roedd mewn lleoliad rhy beryglus i anfon unrhyw un i asesu ei gyflwr.

Mae Gwylwyr y Glannau wedi bod yn cadw golwg arno o bell fore dydd Sul drwy ddefnyddio drôn, ond nid yw'n ymddangos fod y morfil yn fyw.

Galwodd yr elusen ar bobl i beidio a mentro i'r ardal i edrych arno, gan bwysleisio fod cyfyngiadau teithio Covid-19 yn parhau mewn grym.

Mae swyddogion Cyfoeth Naturiol Cymru yn ceisio symud y corff a'r gobaith yw y bydd archwiliad post mortem yn cael ei gynnal arno yn y dyfodol agos.