'Dim camau pellach' yn erbyn yr AS Ceidwadol, Nick Ramsay

Roedd Nick Ramsay wedi'i wahardd fel aelod Torïaidd er iddo ailymuno â grŵp y blaid yn y Senedd ym mis Chwefror

Mae gwaharddiad Aelod Senedd Ceidwadol blaenllaw wedi cael ei godi gan y blaid.

Cafodd Nick Ramsay ei wahardd dros dro ar ôl cael ei arestio a'i ryddhau heb gyhuddiad ym mis Ionawr.

Roedd eisoes wedi cael ailymuno â grŵp y Torïaid yn y Senedd.

Dywedodd y Ceidwadwyr ddydd Mercher na fyddai "unrhyw gamau pellach" yn cael eu cymryd yn ei erbyn.

Aeth Mr Ramsay â'i arweinydd yn y Senedd, Paul Davies, i'r llys i herio ei waharddiad fel AC grŵp Torïaidd.

Daeth y ddwy ochr i gytundeb ac fe gafodd Mr Ramsay ei adfer i'r blaid.

Ond roedd ei waharddiad fel aelod o'r blaid wedi aros yn ei le, tan heddiw.

Ym mis Chwefror dywedodd ei gyfreithiwr fod Mr Ramsay yn ystyried camau cyfreithiol pellach yn erbyn y blaid.

Mr Ramsay yw llefarydd cyllid grŵp Senedd y Torïaid, ac mae'n cadeirio'r pwyllgor cyfrifon cyhoeddus trawsbleidiol.