Y Bencampwriaeth: Abertawe 1-0 Bristol City
- Cyhoeddwyd
Y Cymro Connor Roberts sgoriodd unig gôl y gêm yn Stadiwm Liberty
Mae gobeithion Abertawe o gyrraedd y gemau ail gyfle yn y Bencampwriaeth yn parhau wedi iddyn nhw drechu Bristol City ddydd Sadwrn.
Aeth yr Elyrch ar y blaen reit ar ddiwedd yr hanner cyntaf, gyda'r Cymro Connor Roberts yn sgorio wedi i ergyd Conor Gallagher daro'r postyn.
Cafodd yr ymwelwyr gyfle i ddod yn gyfartal gydag 20 munud yn weddill wrth i Famara Diédhiou ennill cic o'r smotyn, ond fe darodd y postyn gyda'i ergyd.
Mae'r canlyniad yn golygu bod Abertawe dri phwynt o safleoedd y gemau ail gyfle gydag un gêm yn unig yn weddill o'r tymor.
Mae gweddill canlyniadau dydd Sadwrn yn golygu y bydd o leiaf un tîm o Gymru yn rhan o'r gemau ail gyfle.
Er mwyn ennill eu lle yn y chwech uchaf bydd yn rhaid i Abertawe drechu Reading yng ngêm ola'r tymor a gobeithio bod Caerdydd yn colli yn erbyn Hull.