'Byddai'r cathod a'r cŵn wedi boddi petawn ni ddim yma'

Roedd Margaret Evans yn poeni am ei hanifeiliaid anwes wrth i lefel y dŵr godi yn ei chartref

Mae menyw o Bowys wedi disgrifio gorfod achub ei hanifeiliaid anwes o lifogydd yn ei chartref wedi glaw trwm ddydd Llun.

Roedd y dŵr wedi llifo i lawr mynydd ger eiddo Margaret Evans yn Abercraf, gan chwalu tarmac ar lôn gerllaw.

O fewn munudau roedd wedi cyrraedd tu fewn i'r tŷ ble y bu'n byw am 34 o flynyddoedd.

Dywedodd y byddai ei chathod a'i chŵn "wedi boddi yn y gegin petawn ni ddim wedi bod yna".

Cafodd cypyrddau, bwrdd a chadeiriau eu difrodi ac roedd ei pheiriant golchi'n arnofio yn y dŵr.

Ond y bygythiad i'r anifeiliaid anwes oedd ei phrif destun gofid.

"Ffodus"

"Roedd y cathod yn yr ystafell arall, roedden nhw'n nofio felly aethon ni â nhw i fyny grisiau," meddai Mrs Evans, sydd hefyd â dau gi chihuahua.

"Roedden ni'n ffodus ein bod ni yma."

Dywedodd nad yw erioed wedi gweld llifogydd tebyg yn y pentref o'r blaen.

Gwaith clirio wedi'r llifogydd yn Abercraf ddydd Mawrth

Roedd yng nghanol gwneud te pan welodd "ychydig o ddŵr yn dod i lawr.

"Dywedais wrth fy merch i symud ei char, ac yna o fewn 10 munud roedd yn rhedeg i lawr y ffordd fel afon.

"Doeddwn i methu credu faint o ddŵr ddaeth i lawr mewn cyn lleied o amser."

Mae gweithwyr Cyngor Powys wedi treulio nos Lun a dydd Mawrth yn clirio a glanhau, symud rwbel a dadflocio'r ffrwd sy'n llifo lawr Ffordd Tanyrallt, ble mae Mrs Evans yn byw.

Fe wnaeth dwsinau o gartrefi ar draws rhannau o'r canolbarth ddioddef llifogydd wedi cawodydd trwm lleol ddydd Llun.

Ystradgynlais ac Abercraf gafodd eu taro waethaf ond cafodd criwiau Gwasanaeth Tân ac Achub Canolbarth a Gorllewin Cymru eu galw hefyd i bwmpio dŵr o adeiladau yn Aberteifi, yng Ngheredigion.