Llofruddiaeth Penygraig: Diffynydd yn yr ysbyty

Mae Zara Anne Radcliffe bellach dan ofal Ysbyty Rampton yn Sir Nottingham

Mae barnwr wedi gofyn am adroddiadau seiciatryddol ar ddynes sydd wedi'i chyhuddo o lofruddio pensiynwr mewn siop yn Rhondda Cynon Taf.

Mae Zara Radcliffe, 29, o Borth, wedi'i chyhuddo o lofruddio John Rees, 88, o Drealaw, a gafodd ei drywanu yn y Co-op ar Ffordd Tylacelyn, Penygraig ar 5 Mai.

Mae hi hefyd wedi'i chyhuddo o geisio llofruddio Lisa Way, 53, Gaynor Saurin, 65, ac Andrew Price, 58.

Clywodd y llys gan seiciatrydd a archwiliodd Ms Radcliffe ym mis Gorffennaf, ac roedd o'r farn ei bod "yn ffit i bledio o drwch blewyn".

Dywedwyd wrth y llys fod iechyd meddwl y diffynnydd wedi "dirywio" ers yr asesiad hwnnw.

• Menyw o flaen llys ar gyhuddiad o lofruddio

• Achos Pen-y-graig: Cyhuddo menyw o lofruddiaeth

Wrth amddiffyn Ms Radcliffe, dywedodd Jonathan Rees, ei bod wedi cael ei chadw o dan y ddeddf iechyd meddwl er dechrau mis Awst a'i bod yn y ddalfa yn Ysbyty Rampton, Sir Nottingham, lle mae hi'n cael triniaeth.

Gofynnodd y Barnwr Paul Thomas am adroddiadau pellach i benderfynu a ydy Ms Radcliffe yn y cyflwr meddwl gorau i gyflwyno ple erbyn y gwrandawiad nesaf ar 11 Medi.

Mae'n bosib y bydd achos llawn yn dechrau ym mis Hydref.