Drama i gofio 80 mlynedd ers sefydlu Triawd y Coleg

Cedron Sion, Owain Arwyn, Manon Wilkinson, Owen Alun a Siôn Emyr

Mae hi'n 80 mlynedd ers i Driawd y Coleg gael ei sefydlu, ac i ddathlu hynny bydd drama arbennig yn cael ei darlledu ar BBC Radio Cymru.

Cafodd y triawd poblogaidd, sef Cledwyn Jones, Meredydd Evans (Merêd) a Robin Williams (Rogw), ei ffurfio yng Ngholeg Prifysgol Bangor yn 1945.

Fe fuon nhw'n perfformio ar lwyfannau ar draws Cymru gan gyhoeddi sawl record.

Yn y ddrama, Stori Triawd y Coleg, sydd wedi'i hysgrifennu gan Ciron Griffiths, Cedron Sion sy'n chwarae Meredydd Edwards, Siôn Emyr yn chwarae Robin Williams ac Owain Arwyn yn chwarae Cledwyn Jones.

Yn ogystal â'r tri mae Owen Alun yn chwarae rhan Sam Jones, cyn-gynhyrchydd dylanwadol y BBC. Manon Wilkinson sy'n chwarae Nan Davies – un a ddaeth yn ffigwr canolog ym myd adloniant teledu Cymraeg rhwng y 1950au i'r 70au,

Roedd doniau'r tri i'w clywed ar Nosweithiau Llawen y cyfnod a oedd yn cael eu darlledu ar donfeddi'r BBC.

Roedd un o'r actorion, Cedron Sion yn gwerthfawrogi'r cyfrifoldeb o chwarae rhan Meredydd Evans, dywedodd ar raglen Aled Hughes:

"Mae mawredd eu cyfraniad nhw fel triawd wedi gwawrio arna i fwy fwy yn ddiweddar.

"Mae hi'n anodd i ni amgyffred y dyddia' yma cymaint o chwa o awyr iach oedden nhw oedd i Gymru a'r gwrandawyr ar ôl erchylltra'r rhyfel ac mae ei ffrindgarwch nhw'n treiddio'r drwy'r sgript yma hefyd," meddai.

Un her oedd yn wynebu'r actorion oedd ceisio peidio dynwaredu'r cymeriadau yn ormodol ac Owain Arwyn fu'n sôn am y ffin denau rhwng portreadu a dynwaredu.

"Be' sy'n bwysig i'w gael ydi trio cael y gwirionedd i'r geiriau ac i'r sgript, mae hynny yn reit bwysig a ti'n gneud cyfiawnhad wedyn i'r geiriau ac i'r cymeriadau."

Rhywbeth oedd yn sefyll allan i Sion Emyr oedd y ffaith fod gan y tri straeon unigryw eu hunain.

"Pawb dwi wedi sôn wrthyn nhw am y prosiect yma, mae eu hanes nhw yn bellach na'r hyn yr ydan ni'n neud. Maen nhw wedi cyffwrdd cymaint o fywydau a chymaint o bobl. Mae wedi bod yn chwa o awyr iach cael mynd yn ôl a gwrando arnyn nhw," meddai.

Mae modd gwrando ar y ddrama drwy glicio yma.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.