Beirniadu ymddygiad 'anghyfrifol' pobl mewn ref

Credir bod 3,000 o bobl wedi mynd i'r digwyddiad yng Nghwmdulais

Mae plismyn wedi beirniadu ymddygiad "anghyfrifol" pobl mewn ref a oedd yn cynnwys oddeutu tair mil o bobl yn ardal Banwen ar gyrion Bannau Brycheiniog.

Dywed Prif Gwnstabl Heddlu De Cymru, Matt Jukes,nad yw erioed "wedi gweld digwyddiad ar y raddfa yma" o'r blaen ac ar gyfrif Twitter ychwanegodd "wedi aberth pawb yn ystod Covid mae hyn yn gwbl annerbyniol".

Dywed un dyn sy'n byw 14 milltir o leoliad y ref fod y sŵn yn ei gadw'n effro

Mae plismyn yn credu bod pobl wedi teithio o bobl rhan o'r DU i'r ref ym Manwen

Mewn neges ar y cyfryngau cymdeithasol dywed Heddlu De Cymru y gallai cerbydau gael eu symud.

Mae cyfyngiadau Llywodraeth Cymru ond yn caniatáu i hyd at 30 o bobl i gyfarfod tu allan.

"Mae'r rhai sy'n cyfarfod yn gynulleidfa niferus ac yn ymddwyn yn anghymdeithasol yn gwybod bod eu gweithrediadau yn anghyfrifol," meddai'r llu.

"Ry'n yn erfyn ar rieni a gwarchodwyr pobl ifanc i sicrhau eu bod yn gwybod lle mae eu plant a be maen nhw'n ei wneud.

Dywedodd Jill Molen sy'n byw ym mhentref Banwen bod y parti yn "ofnadwy".

Dywed Jill Molen nad oedd pobl yn gallu cysgu o gwbl

"Doedden ni ddim yn gallu cysgu o gwbl - roedd yna bobl yn defnyddio'r stryd fel tŷ bach ac yn gweiddi a sgrechian.

"Roedd y sŵn yna drwy'r amser - sŵn curo a bangio parhaus. Roedd e'n ofnadwy.

"Ry'n wedi bod yn dda iawn yn cadw pellter cymdeithasol yn ystod Covid - mae hyn yn difetha'r cyfan."

Cerddoriaeth curiad trwm

Mae Jamie Bowen yn byw yn Resolfen ryw 14 milltir o'r digwyddiad a dywed ei fod yn gallu "clywed cerddoriaeth andros o uchel" mor gynnar â 03:00.

"Dwi'n sicr bod yna lawer o gwynion," meddai.

"Mae e yn y mynyddoedd yn rhywle ac mae'r sŵn yn dod tuag at lawr.

"Mae'r gerddoriaeth yn cynnwys curiad trwm parhaol."

Cafodd plismyn eu galw i'r pentref fore dydd Sul

Dywedodd yr Uwch Arolygydd Simon Belcher o Heddlu De Cymru: "Mae'r math yma o ymgasglu anghyfreithlon yn gwbl annerbyniol ac ry'n yn ymwybodol o bryderon y gymuned leol.

"Amcangyfrifir bod 3,000 o bobl wedi dod i'r digwyddiad a'u bod wedi teithio o bob rhan o'r DU. Ry'n yn edrych ar hyn o bryd ar bob deddfwriaeth er mwyn gweithredu'n ddiogel.

"Byddwn yn delio â phob cerbyd sydd wedi parcio yn anghyfreithlon a bydd unrhyw un sy'n ceisio dod i'r digwyddiad yn cael ei hel oddi yma."

Ddydd Mercher fe wnaeth Heddlu Dyfed-Powys ddefnyddio pwerau arbennig i chwalu 200 o bobl ifanc a oedd wedi ymgasglu ym Mhorth Tywyn ger Llanelli.

Dywed plismyn bod gwybodaeth arbenigol yn peri iddyn nhw gredu bod mwy o ddigwyddiadau tebyg wedi'u cynllunio ar benwythnos gŵyl y banc.