Pro14: Dreigiau 26 - 18 Zebre
- Cyhoeddwyd
Jordan Williams yn sgorio cais cyntaf y noson
Fe wnaeth dau gais gan y cefnwr Jordan Williams helpu'r Dreigiau i sicrhau pwynt bonws wrth guro Zebre yn Rodney Parade.
Roedd yna geisiau gan Jamie Roberts a'r bachwr Elliot Dee i sicrhau buddugoliaeth gyntaf y rhanbarth yn y Pro14 y tymor hwn.
Ond roedd perfformiad yr ail hanner ddim cystal â'r 40 munud agoriadol gan roi pwysau diangen ar y tîm cartref.
Sgoriodd Federico Mori a Giulio Bisegni geisiau i'r Eidalwyr, ac fe ychwanegodd ciciau Carlo Canna wyth o bwyntiau.
Roedd pedwar o giciau Sam Davies ar ran y tîm cartref yn aflwyddiannus, ond fe sgoriodd gyda dwy gic gosb hwyr.
Collodd Zebre gyfle i gipio pwynt bonws eu hunain wedi trosiad aflwyddiannus gan Antonio Rizzi.