JJ Williams, un o gewri rygbi Cymru, wedi marw yn 72 oed

29 Hydref 2020

Mae un o sêr rygbi Cymru - JJ Williams - wedi marw yn 72 oed.

Roedd yr asgellwr yn cael ei ystyried fel un o chwaraewyr gorau ei wlad yn ystod cyfnod euraidd yr 1970au.

Sgoriodd 12 o geisiau mewn 30 prawf wrth i Gymru ennill pedair pencampwriaeth Pum Gwlad yn y cyfnod hwnnw, gan gynnwys dwy Gamp Lawn.

Aeth ar ddwy daith gyda'r Llewod, gan sgorio pum cais mewn saith gêm brawf.

Roedd hefyd yn rhedwr talentog - fe gynrychiolodd Cymru yng Ngemau'r Gymanwlad yn 1970.

Mae tri o blant JJ Williams hefyd wedi cynrychioli Cymru mewn athletau, gan gynnwys ei fab Rhys, a oedd yn bencampwr Ewropeaidd dros y clwydi.

Huw Evans picture agency

JJ Williams gyda'i fab Rhys, pencampwr Ewropeaidd yn rhedeg dros y clwydi

Ganwyd John James Williams yn Nantyffyllon ar 1 Ebrill, 1948 a mynychodd Ysgol Ramadeg Maesteg.

Cynrychiolodd Gymru yng Ngemau'r Gymanwlad yn 1970 - rhedodd 100m mewn 10.6 eiliad - fel John Williams.

Ond byddai'n cael ei adnabod yn ddiweddarach fel JJ er mwyn osgoi dryswch â'r John Williams arall yn nhîm rygbi Cymru, y cefnwr chwedlonol JPR Williams.

Chwaraeodd Williams i Ben-y-bont ar ddechrau ei yrfa rygbi cyn ymuno â Llanelli yn 1972.

HUW JOHN

JJ Williams (chwith) a JPR Williams yn canu gyda chôr ar gyfer pobl â dementia a'u teuluoedd yn 2018

Enillodd ei gap rhyngwladol cyntaf y flwyddyn ganlynol, cyn cael ei enwi ar gyfer taith chwedlonol y Llewod i Dde Affrica yn 1974.

Yn ystod y daith honno, chwaraeodd y Llewod 22 gêm heb golli - gan ennill tair a chael un gêm brawf gyfartal yn erbyn y Springboks - gyda Williams yn sgorio dau gais yn yr ail a'r trydydd prawf.

Daeth â'r llen i lawr ar ei yrfa mewn steil, gan sgorio cais yn ei gêm olaf i helpu Cymru i guro Lloegr a chipio'r Pum Gwlad yn 1979.

Ar ôl ymddeol, gwnaeth Williams enw iddo'i hun fel sylwebydd dadleuol ar rygbi rhyngwladol a domestig ar gyfer BBC Cymru.

Roedd Williams hefyd yn rhedeg cwmni paentio masnachol a diwydiannol wedi'i leoli ger Pen-y-bont.