Dyn wedi marw mewn tân yn Llangollen
- Cyhoeddwyd
Mae dyn yn ei 70au wedi marw yn dilyn tân mewn tŷ yn Llangollen.
Cafodd y gwasanaethau brys eu galw i'r eiddo wedi adroddiadau am dân ar Ffordd y Capel am 20:42 nos Iau, 3 Rhagfyr.
Daeth diffoddwyr o Langollen, Y Waun, Johnstown, Corwen a Wrecsam i'r safle, gan lwyddo i gael mynediad i'r eiddo gyda chymorth offer anadlu arbennig.
Roedd rhaid iddyn nhw ddiffodd fflamau wrth chwilio'r eiddo, ac fe ddaeth y criwiau o hyd i berson yn y tŷ ond bu farw yn ddiweddarach.
Mae ymchwiliad ar y cyd i achos y tân yn cael ei gynnal gan Wasanaeth Tân ac Achub Gogledd Cymru a Heddlu Gogledd Cymru.
