Caniatáu trwydded i redeg Mansel Davies dan enw arall

Mae'r cwmni o Sir Benfro yn cyflogi tua 300 o bobl

Ddyddiau'n unig wedi i gwmni cludiant Mansel Davies golli ei drwydded ar ôl pledio'n euog i ffugio cofnodion cynnal a chadw cerbydau, mae'r cyfarwyddwyr wedi cael trwydded newydd i redeg y busnes dan enw gwahanol.

Yn dilyn ymchwiliad cyhoeddus fe benderfynodd y Comisiynydd Trafnidiaeth fod y cwmni wedi ei "lygru'n anorchfygol" oherwydd ei fod wedi ffugio cofnodion ac yn "haeddu mynd allan o fusnes".

Ond mae'r cyfarwyddwyr bellach wedi cael trwydded newydd dan yr enw MDS Distribution Limited.

Mae'r cwmni yn un o gwmnïau cludiant mwyaf Cymru, gan gyflogi tua 300 o weithwyr.

Diwylliant 'gwenwynig'

Yn ei ddyfarniad ar 11 Rhagfyr dywedodd y comisiynydd ei fod am wahardd y cwmni, a'i gyfarwyddwyr David Kaye Mansel Davies a Stephen Mansel Edward Davies, rhag dal trwydded gweithredwr eto.

Dywedodd y comisiynydd fod y ddau wedi creu diwylliant cynnal a chadw oedd yn "wenwynig".

Cafodd Rhodri Wyn a Stephen Mansel Edward Davies hefyd eu gwahardd yn gyfnod amhenodol rhag gweithredu fel rheolwyr trafnidiaeth.

Mae'r Comisiynydd Trafnidiaeth yn dweud na fydd gan Stephen Mansel Edward Davies rôl yn rheoli'r cwmni newydd

Wrth roi caniatâd i'r drwydded newydd, dywedodd y Comisiynydd Trafnidiaeth nad oes gan David Kaye Mansel Davies a Stephen Mansel Edward Davies rôl yn rheoli'r busnes newydd, na rôl chwaith sy'n ymwneud â chofnodion cynnal a chadw cerbydau.

"Mae eu cyfnod yn rheoli'r busnes wedi dod i ben ac maen nhw wedi gadael gydag anfri ar eu henwau," meddai'r comisiynydd.

"Os oes yna unrhyw ymdrech i adennill rheolaeth neu ddylanwad tu ôl i'r llenni, bydd enw da y cwmni newydd wedi'i ddifetha a bydd y drwydded yn cael ei ddiddymu."

Ychwanegodd mai Sasha Davies, Scott Davies a Jamie Evans fydd cyfarwyddwyr MDS Distribution.

'Diogelu swyddi'

Dywedodd Mark Davies, cyfreithiwr ar ran cwmnïoedd Mansel Davies a'i Fab a MDS Distribution, fod cyfarwyddwyr y cwmni newydd - Sasha Davies, Scott Davies a Jamie Evans - yn edrych ymlaen at y dyfodol, ac am ddiogelu tua 300 o swyddi.

Ychwanegodd fod y Comisiynydd Trafnidiaeth yn fodlon rhoi trwydded i MDS Distribution ar ôl cael ei fodloni gydag agwedd a phroffesiynoldeb y cyfarwyddwyr newydd.

Dywedodd Mr Davies fod yna welliant mawr wedi ei weld o ran cydymffurfiaeth yn 2019 a 2020.