Cyhuddo dyn, 18, o lofruddiaeth wedi gwrthdrawiad yng Nghaerdydd

Fe ddigwyddodd y gwrthdrawiad ar Heol Trelái ar 27 Medi

Mae dyn 18 oed wedi ymddangos mewn llys ar gyhuddiad o lofruddiaeth yn dilyn gwrthdrawiad yng Nghaerdydd fis diwethaf.

Cafodd y gwasanaethau brys eu galw i Heol Trelái, Caerau am 00:30 ddydd Sadwrn 27 Medi ar ôl adroddiadau bod car wedi taro tri cherddwr.

Bu farw menyw leol 38 oed, Shelley Davies, 38, yn yr ysbyty ddydd Sadwrn, dair wythnos ar ôl cael anafiadau difrifol yn y digwyddiad.

Mewn gwrandawiad byr yn Llys Ynadon Caerdydd ddydd Llun, fe gadarnhaodd Kian Bateman, o ardal Trelái yn y ddinas, ei enw, cyfeiriad a dyddiad geni.

Clywodd y gwrandawiad ei fod hefyd wedi ei gyhuddo o achosi niwed corfforol difrifol i gerddwr arall.

Fe gafodd ei gadw yn y ddalfa nes ei ymddangosiad llys nesaf yn Llys y Goron Caerdydd yn fuan.

Roedd wedi cael ei ryddhau ar fechnïaeth yn dilyn ei arestiad gwreiddiol, ar amheuaeth o achosi niwed corfforol difrifol ac achosi anaf difrifol drwy yrru'n beryglus.

Fe gafodd ei ailarestio yn dilyn marwolaeth Ms Davies a'i gyhuddo o'i llofruddio.

Dywedodd Heddlu De Cymru eu bod yn cydymdeimlo'n arw gyda theulu a ffrindiau Shelley Davies wrth iddyn nhw "geisio ymdopi â'r golled ofnadwy yma".