Dai Young yn dychwelyd i'r Gleision, Mulvihill yn gadael

Daeth Dai Young â'i yrfa fel chwaraewr i ben gyda Chaerdydd yn 2002

Mae Gleision Caerdydd wedi cadarnhau bod y prif hyfforddwr John Mulvihill wedi gadael y rhanbarth, gyda Dai Young yn dychwelyd fel cyfarwyddwr rygbi dros dro.

Dywed y Gleision fod Mulvihill wedi gadael ei swydd ar unwaith oherwydd rhesymau personol.

Cafodd y gŵr o Awstralia ei benodi ym mis Mawrth 2018 i olynu Danny Wilson, ond mae'n gadael wrth iddo nesáu at fisoedd olaf ei gytundeb tair blynedd.

Mae Young yn dychwelyd i'r Arms Park ddegawd ar ôl gadael y Gleision am Wasps.

Collodd y Gleision 17-3 gartref i'r Gweilch yn y darbi Dydd Calan - eu chweched colled mewn 11 gêm y tymor hwn.

Clywodd y chwaraewyr nad oedd Mulvihill ar gael yr wythnos hon am resymau personol, cyn y gêm gartref yn erbyn y Scarlets ar 9 Ionawr.

Roedd John Mulvihill wedi bod ym Mharc yr Arfau ers 2018

Young yn ôl

Fe lywiodd Young y Gleision am naw mlynedd, ac arwain y rhanbarth i rownd gynderfynol Cwpan Heineken yn 2009, cyn colli gêm gyfartal ar giciau cosb.

Bu hefyd yn llwyddiannus yn y Cwpan Eingl-Gymreig yn 2009.

Dechreuodd cyn-brop Cymru a'r Llewod ei yrfa gydag Abertawe ac yna Caerdydd cyn symud i chwarae rygbi'r gynghrair gyda Leeds yn 1990.

Aeth ymlaen i fod yn gyfarwyddwr rygbi yn Wasps am naw mlynedd, gan arwain y clwb i'r gemau ail gyfle yn yr Uwch Gynghrair dair gwaith rhwng 2016 a 2018, cyn gadael ar ddechrau 2020.

Bydd cyn-fewnwr Cymru a'r Llewod, Dwayne Peel, hefyd yn ymuno â staff hyfforddi'r Gleision yr haf nesaf o Ulster.