Arestio dau yn dilyn tân mewn tŷ ym Miwmares

Criwiau tân yn Stryd Meigan, Biwmares fore Sadwrn

Mae dau berson - dyn a dynes - wedi cael eu harestio yn dilyn tân mewn tŷ ym Miwmares ddydd Sadwrn.

Fe gyrhaeddodd criwiau tân yr eiddo yn Ffordd Meigan ychydig wedi 09:00.

Chafodd neb anaf yn y digwyddiad, a dyw Heddlu Gogledd Cymru heb gadarnhau ar ba amheuaeth y cafodd y ddau berson eu harestio.

Mae'r heddlu a Gwasanaeth Tân ac Achub Gogedd Cymru'n ymchwilio i'r achos ar y cyd.

Dywed y gwasanaeth tân eu bod wedi gorfod cyfuno aelodau criwiau lleol er mwyn ymateb i'r digwyddiad oherwydd "lefelau staffio isel" yn yr ardal.

Cafodd aelodau criwiau Porthaethwy a Biwmares gefnogaeth cydweithwyr o Fangor a'r Rhyl gan nad oedd criwiau llawn ar gael pan wnaethon nhw dderbyn yr alwad frys.

Dywed penaethiaid bod lefelau staffio isel "yn ganlyniad trafferthion recriwtio, staff yn gadael y gwasanaeth a staff nad sydd ar gael oherwydd ymroddiadau eu gwaith sylfaenol".

Mae hyn oll, maen nhw'n dweud, yn creu "heriau sylweddol o ran darparu ymateb brys llawn amser yn yr ardal yma".

Dywedodd y Prif Swyddog Tân Cynorthwyol, Stuart Millington: "Wrth gwrs ein dymuniad fyddai i wastad gael criwiau ar gael ymhob un o'n gorsafoedd tân, ond mae hyn yn gynyddol anoddach yn ardaloedd llai poblog gogledd Cymru."