Jonathan Davies yn dychwelyd i herio Lloegr

Bydd Jonathan Davies yn dechrau fel rhif 12, yn hytrach na'r 13 arferol

Mae Wayne Pivac wedi cyhoeddi'r tîm fydd yn herio Lloegr yng Nghaerdydd ddydd Sadwrn, gyda nifer o enwau mawr yn dychwelyd.

Mae Jonathan Davies yn holliach, ond mae'n dechrau fel rhif 12 yn hytrach na'r 13 arferol, gyda George North yn ymuno fel y canolwr arall.

Kieran Hardy fydd yn dechrau fel mewnwr, gyda Josh Adams hefyd yn dychwelyd ar ôl cael ei wahardd am ddwy gêm gynta'r Chwe Gwlad am dorri rheolau Covid-19.

Mae'r blaenasgellwr, Josh Navidi yn holliach hefyd, ac ef sydd wedi'i ddewis i ymuno â Justin Tipuric a Taulupe Faletau yn y rheng-ôl.

Does dim lle i Leigh Halfpenny wedi iddo ddioddef ergyd i'w ben yn erbyn Yr Alban, sy'n golygu bod Liam Williams yn symud o'r asgell i fod yn gefnwr.

Mae Kieran Hardy wedi'i ffafrio fel mewnwr yn hytrach na Gareth Davies

Fe fydd hi'n ddiwrnod mawr i North, wrth iddo ennill ei 100fed cap rhyngwladol.

Mae Cymru wedi cael dechrau gwych i'r bencampwriaeth, gan drechu Iwerddon a'r Alban, ac fe fyddan nhw'n anelu am y Goron Driphlyg yn erbyn Lloegr ddydd Sadwrn.

I Loegr mae Jamie George yn ôl fel bachwr, gyda'r hyfforddwr Eddie Jones wedi dewis tîm profiadol ar gyfer eu tair i Gaerdydd.

Dau newid sydd i'r tîm wnaeth drechu'r Eidal, gyda George yn cymryd lle Luke Cowan-Dickie a Mark Wilson yn llenwi'r bwlch sydd wedi'i adael gan yr anaf i Courtney Lawes.

Canslo gêm Ffrainc a'r Alban

Yn y cyfamser mae trefnwyr y gystadleuaeth wedi gohirio'r gêm rhwng Ffrainc a'r Alban y penwythnos hwn wedi i nifer o achosion Covid ddod i'r amlwg ymysg carfan y Ffrancwyr.

Dyw hi ddim yn eglur eto pryd y bydd modd cynnal y gêm honno, ond ar hyn o bryd mae Cymru i fod i herio Ffrainc yng ngêm ola'r gystadleuaeth ar 20 Mawrth.

Bydd George North yn ennill cap rhif 100 yn Stadiwm Principality brynhawn Sadwrn

Tîm Cymru

Liam Williams; Louis Rees-Zammit, George North, Jonathan Davies, Josh Adams; Dan Biggar; Kieran Hardy; Wyn Jones, Ken Owens, Tomas Francis, Adam Beard, Alun Wyn Jones (c), Josh Navidi, Justin Tipuric, Taulupe Faletau.

Eilyddion: Elliot Dee, Rhodri Jones Leon Brown, Cory Hill, James Botham, Gareth Davies, Callum Sheedy, Willis Halaholo.

Tîm Lloegr

Elliot Daly; Anthony Watson, Henry Slade, Owen Farrell, Jonny May; George Ford, Ben Youngs; Mako Vunipola, Jamie George, Kyle Sinckler, Maro Itoje, Jonny Hill, Mark Wilson, Tom Curry, Billy Vunipola

Eilyddion: Luke Cowan-Dickie, Ellis Genge, Will Stuart, Charlie Ewels, George Martin, Ben Earl, Dan Robson, Max Malins