Siart Amgen Rhys Mwyn 2025

Mae geirfa ar ddiwedd yr erthygl i bobl sy'n dysgu Cymraeg.

Ers wythnosau, mae gwrandawyr rhaglen Rhys Mwyn ar BBC Radio Cymru wedi bod yn enwebu caneuon er mwyn i banel o arbenigwyr ddewis deg uchaf o draciau amgen 2025.

Roedd tri ar y panel dewis, sef Efa Thomas, Molly Palmer a Gareth Potter.

Yn 2024, CELAVI oedd yn rhif 1, gyda'r gân Cofia'r Enw. Ond pwy sydd wedi dod i'r brig yn y Siart Amgen eleni?

• Gwrandewch yn ôl ar y rhaglen ar BBC Sounds

10. Ennill Yn Barod - Ani Glass

Fe wnaeth Ani Glass ryddhau y gân hon i ddathlu taith Cymru i bencampwriaeth Cwpan y Byd 2022. Dyna'r tro cyntaf i dîm pêl-droed Cymru gyrraedd Cwpan y Byd ers 1958.

Tybed a fydd Cymru'n ennill lle yn y bencampwriaeth yn 2026?

9. Popeth (DDIM) Yn Iawn - Taran

Band o Gaerdydd yw Taran. Fe wnaethon nhw ffurfio yn 2023 ar gyfer Tafwyl.

Enillodd y band wobr Record Fer Orau yng Ngwobrau'r Selar yn ôl ym mis Mawrth 2025.

Fe wnaeth y prif leisydd, Rose Datta, ennill ar raglen Y Llais ar S4C yn 2025, o dan arweiniad y gantores Aleighcia Scott.

8. Syched Cas – Dewin

O fro y Preseli y daw Dewin. Maen nhw'n disgrifio eu cerddoriaeth fel "pop-dewinol."

Enillodd Jencyn a Lefi Gwobr Goffa Richard a Wyn (Ail Symudiad) ac maen nhw wedi bod yn gigio drwy'r haf yng ngwyliau gorllewin Cymru.

Cyn bo hir, byddan nhw'n mynd i'r stiwdio i recordio albwm.

7. Poen Yn Y Baltics - Hap a Damwain

Hap a Damwain ydi band o Fae Colwyn sy'n ysgrifennu caneuon 'pop a baledi arbrofol'. Mae Aled a Simon wedi bod yn perfformio gyda'i gilydd ers 2019.

Mae eu halbwm, Diwedd Hanes, allan ers mis Ionawr.

6. Llygaid Cwrw - Lleucu Non

Animeiddio mae Lleucu Non wrth ei gwaith, ond mae hi'n dweud bod cerddoriaeth yn cysylltu efo'r gwaith yna.

Mae cerddoriaeth yn helpu i ddeffro dychymyg a chreu gofod ar gyfer emosiynau neu syniadau iddi hi.

Dechreuodd ysgrifennu caneuon ei hun yn 2020, a'u rhyddhau yn 2024.

5. Mabolgampau - Chwaer Fawr

Prosiect unigol Mari Morgan yw Chwaer Fawr.

Mae Mari wedi gweithio gyda bandiau fel Rogue Jones, Saron a Bitw yn y gorffennol.

Mabolgampau yw ei hail sengl.

4. Tyrchu - Don Leisure & Gruff Rhys

Mae'r trac hwn oddi ar yr albwm Tyrchu Sain.

Fe wnaeth Don Leisure greu yr albwm drwy fynd, neu dyrchu, drwy archif Recordiau Sain.

Mae sawl artist gan gynnwys Gruff Rhys yn ymddangos ar yr albwm.

3. Tristwch y Fenywod - Ferch Gyda'r Llygaid Du

Band gothig Cymraeg o Leeds yw Tristwch y Fenywod.

Maen nhw yn ceisio rhoi stamp eu hunain ar gerddoriaeth Gymraeg. Dywedon nhw wrth Cymru Fyw:

"Mae 'na elfennau clasurol mewn cerddoriaeth goth, pethau fel sain atmosfferig, y minor key ac effeithiau gwahanol sy'n creu sŵn seicadelig ac arallfydol."

2. Addo – Adwaith

Mae'r blynyddoedd diwethaf wedi bod yn llwyddiannus iawn i'r band o Gaerfyrddin sy'n dathlu degawd eleni.

Maen nhw wedi ennill y Wobr Gerddoriaeth Gymreig ddwywaith, wedi cael dros filiwn o ffrydiadau ar Spotify, ac wedi perfformio yn Glastonbury.

Fe wnaethon nhw gyhoeddi ym mis Awst eu bod nhw am gymryd seibiant amhenodol unwaith y daw gigs 2025 i ben.

1. Ethiopia Newydd - Geraint Jarman

Bu farw'r cerddor, bardd a chyfansoddwr Geraint Jarman yn mis Mawrth 2025. Roedd yn un o fawrion Cymru a'i ddylanwad yn eang.

Cafodd Ethiopia Newydd ei rhyddhau yn wreiddiol yn 1978.

Geirfa

enwebu / to nominate

arbenigwyr / experts

dewis / to choose

traciau amgen / alternative tracks

dod i'r brig / come out on top

siart / chart

eleni / this year

rhyddhau / to release

pencampwriaeth / championship

ffurfio / to form

prif leisydd / main vocalist

ennill / win

arweiniad / leadership

cantores / singer

bro / region

disgrifio / to describe

pop dewinol / wizard pop

Gwobr Goffa / Memorial Prize

gwyliau / festivals

gorllewin / west

cyn bo hir / soon

arbrofol / experimental

animeiddio / to animate

cysylltu / connect

deffro / to wake

dychymyg / imagination

gofod / space

unigol / solo

y gorffennol / the past

mabolgampau / sport games

tyrchu / to dig through

ymddangos ar / to feature on

elfennau / elements

clasurol / classical

seicadelig / psychedelic

arallfydol / otherworldly

llwyddiannus / successful

degawd / decade

ffrydiadau / streams

seibiant / break

amhenodol / indefinite

cerddor / musician

bardd / poet

cyfansoddwr / composer

mawrion / greats

dylanwad / influence

yn wreiddiol / originally

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.