Dod i hyd i rafft achub cwch pysgotwyr coll

Methodd y Nicola Faith â dychwelyd i harbwr Conwy ar 27 Ionawr

Mae rafft achub cwch pysgota a ddiflannodd oddi ar arfordir gogledd Cymru ym mis Ionawr wedi dod i'r fei oddi ar arfordir de'r Alban.

Methodd y Nicola Faith â dychwelyd i harbwr Conwy ar 27 Ionawr, ac mae tri physgotwr o'r ardal yn parhau ar goll.

Cafwyd hyd i'r rafft oddi ar arfordir Kirkcudbrightshire gan wasanaeth Gwylwyr y Glannau.

Mae teuluoedd y pysgotwyr - Ross Ballantine, 39, Alan Minard, 20, a Carl McGrath, 34 - wedi cael gwybod.

Mae Alan Minard, Ross Ballantine a Carl McGrath yn dal ar goll

Mae'r Gangen Ymchwilio i Ddamweiniau Morol (MAIB) wedi cadarnhau bod y rafft yn perthyn i'r Nicola Faith, a bydd yn cael ei chludo i Southampton am ragor o ymchwiliadau a dadansoddiadau.

Mae'r chwilio am y cwch ei hun hefyd yn parhau, dan arweiniad MAIB, sy'n cydweithio ag arbenigwyr chwilio tanddwr i archwilio ardal eang, yn cynnwys y mannau ble roedd y Nicola Faith yn arfer gweithredu.

Dywedodd chwaer Mr Ballantine, Lowri Taylor eu bod wedi cael gwybod nad oedd unrhyw offer ar y rafft achub wedi cael ei ddefnyddio.

"Mae hynny'n ateb un cwestiwn - rydyn ni'n gwybod nad oedden nhw ar y rafft achub allan ar y môr am ddyddiau yn ceisio cael help," meddai.

Daeth y rafft achub i'r fei oddi ar arfordir de'r Alban