George Floyd: Gweinidog yn ymddiheuro am sylwadau 'ansensitif'

Mae Lee Waters wedi cyfaddef bod amseru ei neges ar Twitter yn "ansensitif"

Mae gweinidog Llywodraeth Cymru wedi ymddiheuro am feirniadu'r sylw oedd yn cael ei roi gan y cyfryngau i reithfarn achos llofruddiaeth George Floyd.

Roedd y gweinidog Llafur Lee Waters wedi dweud y byddai gan Gymru "ymgyrch etholiadol well" pe bai'n cael yr un sylw â "newyddion domestig yr Unol Daleithiau".

Cafwyd y cyn-heddwas Derek Chauvin yn euog o lofruddio Mr Floyd ar ôl penlinio ar ei wddf yn ystod ei arestiad ym Minneapolis fis Mai diwethaf.

Sbardunodd y digwyddiad brotestiadau ledled y byd yn erbyn hiliaeth a grym gormodol.

Fe bostiodd Mr Waters, dirprwy weinidog trafnidiaeth yn Llywodraeth Cymru, ei sylwadau ar Twitter wrth wylio'r Ten O'Clock News ar y BBC, a oedd yn rhoi sylw i reithfarn y rheithgor yn fyw nos Fawrth.

Ysgrifennodd: "Pe bai gan bobl yng Nghymru gymaint o fynediad at gymaint o sylw yn y cyfryngau i benderfyniadau a oedd yn effeithio ar Gymru ag sydd ganddynt o newyddion domestig yr Unol Daleithiau, byddem yn cael gwell ymgyrch etholiadol."

Mae etholiadau Senedd Cymru yn cael eu cynnal ar 6 Mai.

Yn ddiweddarach, fe wnaeth Mr Waters ddileu'r trydariad, gan ddweud: "O ran edrych 'nôl, amseru ansensitif. Heb dynnu oddi wrth anferthwch y mater, roedd yn rhwystredig bod News at 10 wedi troi ei hun yn Newyddion24".

Fe sbardunodd farwolaeth George Floyd brotestiadau ar hyd a lled America a'r byd

Beth ydy'r ymateb?

Cafodd sylwadau gwreiddiol y gweinidog eu beirniadu fel rhai "erchyll" ac "anwybodus" gan ddefnyddwyr eraill y platfform cyfryngau cymdeithasol.

Roedd ymateb pleidiau gwleidyddol eraill hefyd yn feirniadol o'r gweinidog Llafur.

Dywedodd llefarydd ar ran Plaid Cymru: "Roedd trydariad Lee Waters yn amhriodol iawn, yn wael ei farn ac yn ddifeddwl.

"Mae llofruddiaeth George Floyd a'r achos dilynol o arwyddocâd byd-eang ac yn ein hatgoffa'n gryf bod angen gwneud cymaint mwy i fynd i'r afael â hiliaeth strwythurol a sefydliadol - gan gynnwys yma yng Nghymru."

Dywedodd llefarydd ar ran Democratiaid Rhyddfrydol Cymru: "Mae gwneud y gymhariaeth rhwng marwolaeth unigolyn yn nwylo'r heddlu a'i farn am sylw gwleidyddol yng Nghymru yn farn ffôl ac eithriadol o wael. Rydym yn falch o weld ei fod dileu ei drydariad."