George North allan o daith y Llewod i Dde Affrica
- Cyhoeddwyd
Roedd North yn un o chwaraewyr amlycaf Cymru yn y Chwe Gwlad eleni
Mae asgellwr a chanolwr Cymru, George North allan o daith y Llewod i Dde Affrica oherwydd anaf difrifol i'w ben-glin.
Rhwygodd y chwaraewr 29 oed ligament yn ei ben-glin (ACL) yn chwarae i'r Gweilch yn erbyn Gleision Caerdydd yng Nghwpan yr Enfys Pro14 ddydd Sadwrn.
Cadarnhaodd North y bydd yn cael llawdriniaeth yr wythnos nesaf.
Bydd hyfforddwr y Llewod, Warren Gatland, yn enwi ei garfan 36 dyn i wynebu De Affrica ar 6 Mai.
Trydarodd North: "Gall chwaraeon fod yn greulon. Rydyn ni i gyd yn gwybod y risgiau pan fyddwn ni'n mynd ar y cae.
"Yn anffodus, fe wnes i dorri fy ACL ddydd Sadwrn a bydd angen llawdriniaeth arnaf yr wythnos nesaf."
Caniatáu cynnwys X?
Mae’r erthygl yma’n cynnwys elfennau sydd wedi eu darparu gan X. Gofynnwn am eich caniatâd cyn eu llwytho, oherwydd fe allai wneud defnydd o cwcis a thechnolegau eraill. Efallai y byddwch am ddarllen polisi cwcis X, dolen allanol a pholisi preifatrwydd, dolen allanol cyn derbyn. I weld y cynnwys yma dewiswch ‘derbyn a pharhau’.
Dioddefodd North y broblem yn gynnar yn yr ail hanner yn Stadiwm Liberty ddydd Sadwrn.
Roedd yn ymddangos fod ei goes wedi mynd yn sownd yn y ddaear ac roedd yn amlwg mewn poen cyn cael ei gario oddi ar y cae.
Roedd yn chwarae ar yr asgell ar gyfer ei ranbarth ar ôl cael ei ddefnyddio fel canolwr gan hyfforddwr Cymru, Wayne Pivac y tymor hwn.
Chwaraeodd North ran bwysig yn llwyddiant Cymru yn y Chwe Gwlad eleni, gan greu argraff yn y canol.
Roedd â siawns go dda o gael ei enwi yng ngharfan Gatland i fynd ar y daith i Dde Affrica ym mis Gorffennaf ac Awst.
Mae North wedi ennill 101 o gapiau dros Gymru, ac wedi chwarae dros y Llewod ar deithiau i Awstralia yn 2013 a Seland Newydd yn 2017.
Straeon perthnasol
- Cyhoeddwyd24 Ebrill 2021
