Cwpan yr Enfys y Pro14: Scarlets 22-6 Gweilch
- Cyhoeddwyd
Helpodd Jonathan Davies ei dîm i fuddugoliaeth yn dilyn y siom o beidio â chael ei ddewis ar gyfer carfan y Llewod eleni
Llwyddodd y Scarlets i sicrhau eu buddugoliaeth gyntaf yng nghystadleuaeth Cwpan yr Enfys y Pro14 wrth drechu'r Gweilch mewn tywydd gwael ar Barc y Scarlets.
Dim ond un cais a sgoriwyd drwy gydol y gêm, gyda'r prop Alex Jeffries yn croesi i'r Scarlets ar ôl gwaith da gan Jonathan Davies.
Cicio cywir Leigh Halfpenny oedd yn gyfrifol am weddill pwyntiau'r tîm cartref, gyda throsiad llwyddiannus a phum cic gosb.
Llwyddodd Luke Price gyda chic gosb ym mhob hanner i'r Gweilch, ond doedd hynny ddim yn ddigon i'w cadw nhw o fewn cyrraedd eu gwrthwynebwyr.