Yr AS Darren Millar yn dychwelyd i'r fainc flaen

Mae Darren Millar wedi dychwelyd i'w swydd fel prif chwip y Ceidwadwyr Cymreig yn y Senedd

Mae Aelod o'r Senedd wedi cael ei ailbenodi i rôl mainc flaen y Ceidwadwyr Cymreig wedi iddo roi'r gorau i'r swydd yn dilyn y ffrae dros yfed alcohol.

Mae Grŵp y Ceidwadwyr Cymreig wedi cadarnhau bod Darren Millar wedi dychwelwyd i'w swydd fel prif chwip.

Roedd wedi ymddiswyddo o'i rôl wedi iddo ef a thri o ASau eraill gael eu dal yn yfed alcohol yn adeilad y Senedd ym mis Rhagfyr ond dyddiau ar ôl i'r gwaharddiad ar weini alcohol ddod i rym.

Gofynnwyd i Geidwadwyr Cymru am sylwadau.

Fe wnaeth pedwar AS yfed alcohol yn ystafell de Senedd Cymru ym mis Rhagfyr y llynedd - Darren Millar, Paul Davies, y cyn-AS Ceidwadol Nick Ramsay ac Alun Davies o'r blaid Lafur.

Y pedwar Aelod o'r Senedd a gafodd eu dal yn yfed yn adeilad y Senedd - (ch-dd) Alun Davies, Paul Davies, Darren Millar a Nick Ramsay

Ymchwiliadau i'r digwyddiad

Nid yw dau ymchwiliad i'r digwyddiad wedi adrodd yn gyhoeddus eto - un gan y comisiynydd safonau Douglas Bain, ac un arall gan y Gwasanaethau Rheoliadol a Rennir (SRS) - corff trwyddedu ar gyfer Cynghorau Caerdydd, Bro Morgannwg a Phen-y-bont ar Ogwr.

Deellir bod ymchwiliad yr SRS yn parhau.

Mae disgwyl i Mr Millar, AS Gorllewin Clwyd gael ei ailbenodi'n aelod o'r pwyllgor busnes ddydd Mercher - swydd yr oedd hefyd wedi ymddiswyddo ohoni ar y pryd.

Mae aelodau o'r pwyllgor busnes - corff trawsbleidiol pwysig sy'n cytuno ar lawer o weithgareddau gwleidyddol y Senedd - yn denu cyflog ychwanegol o £9,154, gan ddod â chyflog Aelod Seneddol i £76,803.

Fe wnaeth Mr Millar roi'r gorau i fainc flaen y Ceidwadwyr ar yr un pryd ag yr ymddiswyddodd Paul Davies fel arweinydd y Ceidwadwyr yn y Senedd.

Yn ei le yntau daeth Andrew RT Davies, a arweiniodd y blaid drwy etholiad y Senedd lle cynyddodd y blaid ei nifer o seddi.

Mae Mr Millar, Paul Davies ac Alun Davies i gyd wedi ymddiheuro am y digwyddiad.

Dywedodd Mr Millar ar adeg ei ymddiswyddiad: "Er fy mod yn cael fy nghynghori na 'nes i dorri rheolau coronafeirws, mae'n ddrwg iawn gen i am fy ymddygiad, yn enwedig o ystyried effaith y cyfyngiadau anodd y mae pobl a busnesau yn eu goddef.

"Am y rheswm yma, ac o gofio bod Paul Davies wedi ymddiswyddo fel arweinydd Grŵp Ceidwadwyr Cymru yn y Senedd, rwyf wedi penderfynu camu i lawr o fy rôl fainc flaen yn Senedd Cymru."

Dywedodd llefarydd ar ran Comisiynydd Safonau'r Senedd: "Mae adran 16 o Fesur Comisiynydd Safonau Cynulliad Cenedlaethol Cymru 2009 yn gwahardd y comisiynydd rhag datgelu unrhyw wybodaeth am unrhyw gŵyn a allai fod wedi dod i law neu beidio."