'Pawb i gael cynnig brechlyn Covid-19 erbyn canol Mehefin'

Mae pawb yng Nghymru yn debygol o gael cynnig dos cyntaf o frechlyn Covid-19 fis yn gynt na'r disgwyl, meddai Llywodraeth Cymru.

Yn wreiddiol roedd y llywodraeth wedi ymrwymo i gyrraedd y garreg filltir o frechu pawb dros 18 erbyn diwedd Gorffennaf.

Maent bellach yn rhagweld y bydd pawb wedi cael cynnig y dos cyntaf yn ystod yr wythnosau nesaf.

Llywodraeth y DU sy'n trefnu cyflenwadau o'r brechlynnau, ond cyfrifoldeb Llywodraeth Cymru a'r Gwasanaeth Iechyd yng Nghymru yw eu dosbarthu.

Mae rhwydwaith o ganolfannau brechu a meddygfeydd wedi bod yn defnyddio tri math o frechlyn ers mis Rhagfyr 2020.

Mewn datganiad dywedodd llefarydd ar ran Llywodraeth Cymru: "Mae dros hanner pobl 18-29 oed yng Nghymru wedi derbyn y dos cyntaf o'r brechlyn erbyn hyn ac ry'n ni'n gobeithio y byddwn wedi cynnig y dos cyntaf i bob oedolyn ymhen pythefnos."

Dywed Bwrdd Iechyd Prifysgol Caerdydd a'r Fro eu bod eisoes wedi cynnig dos cyntaf o'r brechlyn i bob oedolyn.

O ddydd Iau ymlaen gall pobl sydd heb fynychu apwyntiad fynd i ganolfan frechu ym Mae Caerdydd heb wneud apwyntiad o flaen llaw.