Cyhoeddi enw dyn fu farw'n sydyn yn Sir Benfro

Cafodd y dyn ei ganfod ar Stryd Laws yn Noc Penfro yn oriau mân y bore, meddai'r heddlu

Mae'r heddlu wedi cyhoeddi enw dyn 27 oed a gafodd ei ganfod yn farw yn Sir Benfro dros y penwythnos.

Cafwyd hyd i Michael Edgar ar Stryd Laws yn Noc Penfro yn oriau mân y bore ddydd Sadwrn, 29 Mai.

Dywed Heddlu Dyfed-Powys fod dau ddyn a gafodd eu harestio mewn cysylltiad â'r farwolaeth bellach wedi'u rhyddhau dan ymchwiliad.

Maen nhw'n parhau i ymchwilio i farwolaeth Mr Edgar ac annog y cyhoedd i gysylltu â nhw os oes ganddyn nhw wybodaeth.

"Oherwydd yr amser anodd yma i'r teulu, byddem yn annog y cyhoedd i beidio â dyfalu ar amgylchiadau'r digwyddiad hwn ond i gysylltu â'r heddlu os oes gennych unrhyw wybodaeth berthnasol," meddai'r llu.

"Mae'r teulu hefyd wedi gofyn am breifatrwydd ar yr adeg anodd hon."

Dywedodd y llu bod swyddogion arbennig yn cefnogi'r teulu.