50% yn llai o bobl yn gweithio ynghanol Caerdydd ers Covid

Mae llai o bobl wedi bod yn gweithio ac yn gwario arian yng Nghaerdydd yn ystod y pandemig, medd ymchwil

Mae nifer y bobl sy'n gweithio ynghanol Caerdydd 50% yn is na chyn y pandemig, medd gwaith ymchwil newydd.

Mae astudiaeth gan ganolfan ymchwil y ar gyfer economeg a busnes yn dangos bod canran y niferoedd sydd wedi dychwelyd i swyddfeydd yng Nghaerdydd bedair gwaith yn is nag mewn pedair dinas fawr arall yn y DU.

Mae'r ymchwil hefyd yn dangos bod £400m yn llai wedi cael ei wario ynghanol y ddinas nag ym Mawrth 2020.

Dywed Llywodraeth Cymru eu bod yn cydnabod "effaith fawr" Covid ac yn gweithio'n agos gyda sectorau sydd wedi dioddef.

Mae'r gwaith ymchwil yn nodi hefyd y byddai gwariant mewn siopau, bwytai a thafarndai y brifddinas £6.3m yn is y mis na chyn y pandemig, petai gweithwyr ond yn gweithio yn y ddinas dau ddiwrnod yr wythnos ar gyfartaledd.

Ond mae'r effaith ariannol ar Gaerdydd yn is nag ar Lundain, Manceinion, Glasgow a Newcastle - y dinasoedd eraill a nodir yn yr astudiaeth.

Mae cwmni Zipporah, cwmni TG o Gaerdydd, wedi penderfynu symud o uned fawr i uned lai y llynedd wedi iddynt ganfod bod gweithio o adref yn fwy defnyddiol i'w staff.

Mae busnesau fel Zipporah wedi symud i adeilad llai wrth i fwy ddewis gweithio o adref

Dywedodd cyfarwyddwr technegol Zipporah, Scott Burton: "Fe wnaethon ni ddechrau edrych am le llai Awst y llynedd.

"I ddechrau fe wnaethon ni edrych ar ganol y ddinas fel bod staff yn nes at y siopau ond doedd hynny ddim "yn gweithio'n ariannol."

Yn lle hynny fe wnaeth y cwmni symud i swyddfa fach yn Llaneirwg ar gyrion y brifddinas - swyddfa sydd â digon o le i 15 neu 20 o staff ond rhyw bump o bobl sy'n gweithio yno bob dydd.

'Caerdydd wedi newid'

Mae Rory Fleming yn rheoli dwy arcêd

Dywed Rory Fleming, rheolwr dwy arcêd yng Nghaerdydd bod hi'n anodd cymharu y cyfnod presennol â 2019 gan fod cymaint o bethau wedi newid.

"Yn 2019 roedd swyddfeydd yn llawn ac roedd pobl yn hyderus i ddefnyddio trafnidiaeth gyhoeddus. Ond dim ond newydd gael yr hawl i ailagor y tu mewn mae busnesau lletygarwch.

"Er bod ffigyrau prynu a gwerthu yn is na 2019 mae yna gynnydd cyson - a byddai'n dda petai hynny yn para tan ddiwedd y flwyddyn.

"Bydd pobl, heb os, yn bryderus am ddychwelyd i ganol y ddinas a'r cyfan a allwn ni ei wneud yw creu amgylchedd a fydd yn gwneud pobl i deimlo'n ddiogel."

Dywed adroddiad a baratowyd i Gyngor Caerdydd nad yw'n glir hyd yma effaith gweithio o adref ar ganol y ddinas ac nad yw'n eglur chwaith a fydd brechu eang yn peri i fwy o bobl ddychwelyd i'r swyddfa.

Nodir bod y symudiad i weithio o adref wedi bod yn "enfawr" a rhagwelir y bydd hynny yn parhau i raddau ond fe allai hynny ddenu cwmnïau sydd wedi arfer gweithredu mewn dinasoedd mwy, gan gynnwys Llundain.

'Effaith fawr'

Dywedodd llefarydd ar ran Llywodraeth Cymru: "Ry'n yn llwyr gydnabod effaith y pandemig ar strydoedd mawr ar draws Cymru a dyna pam ein bod yn gweithio'n agos gyda'r sectorau manwerthu a lletygarwch i ymateb i'r heriau sy'n eu hwynebu yn y tymor byr, canolig a hir.

"Ers dechrau'r pandemig ry'n wedi ymrwymo dros £2.5bn i fusnesau ar draws Cymru - hynny'n ychwanegol i'r gefnogaeth sy'n cael ei roi fel arfer drwy Busnes Cymru.

"Yn ychwanegol mae ein rhaglen Trawsnewid Trefi yn darparu bron i £110m o gymorth i gefnogi adferiad economaidd a chymdeithasol canol ein trefi a'n dinasoedd.

"Mae gennym hefyd gynlluniau uchelgeisiol gan gynnwys treialu cyfres o hybiau wedi'u lleoli yn y gymuned er mwyn annog pobl i weithio yn nes at adref a chynyddu nifer yr ymwelwyr â chanol trefi."