Dyn, 63, wedi marw ar ôl gwrthdrawiad ger Llannerchymedd
- Cyhoeddwyd
Mae dyn 63 oed wedi marw yn dilyn gwrthdrawiad un cerbyd ger Llannerchymedd, Ynys Môn prynhawn Mercher.
Roedd John Owen yn ffermwr lleol ac yn teithio mewn Isuzu Rodeo du, a bu farw yn y fan a'r lle yn dilyn y gwrthdrawiad ar Lon Leidr yn Llandyfrydog.
Yn ôl Heddlu Gogledd Cymru cafodd y gwasanaethau brys eu galw i'r lleoliad yn fuan ar ôl 17:00 ac er gwaethaf eu hymdrechion gorau, nid oedd modd achub ei fywyd.
Cafodd y ffordd ei chau er mwyn caniatáu i dîm fforensig yr heddlu gynnal ymchwiliad trylwyr i amgylchiadau'r digwyddiad.
Ail-agorwyd y ffordd yn fuan ar ôl 21:00 nos Fercher.
Dywedodd y Sarjant Raymond Williams o'r Uned Plismona Ffyrdd: "Mae marwolaeth sydyn ac annisgwyl yn dilyn gwrthdrawiad ffordd bob amser yn sioc ac rwy'n estyn fy nghydymdeimlad â theulu Mr Owen ar yr adeg anodd hon.
"Rwy'n apelio ar unrhyw un a oedd yn teithio yn ardal Llandyfrydog ar y pryd a welodd y gwrthdrawiad neu allai fod â lluniau dash cam sy'n dangos yr Isuzu Rodeo du cyn y gwrthdrawiad i gysylltu trwy ffonio 101 gan ddyfynnu'r cyfeirnod 21000526628."