Seithfed aur i Aled Siôn Davies ym mhencampwriaethau'r byd

Mae'r llwyddiant diweddaraf yn golygu bod Aled Siôn Davies nawr wedi ennill 11 medal aur ym Mhencampwriaethau Para Athletau'r Byd

Mae'r Cymro Aled Siôn Davies wedi ennill ei seithfed medal yn olynol yn un o gystadlaethau Pencampwriaethau Para Athletau'r Byd.

Daeth i'r brig yn y gystadleuaeth taflu maen F63, fel aelod o dîm Prydain Fawr, ar ddiwrnod olaf y cystadlu yn India.

Dyma'r 11eg tro iddo ennill teitl pencampwriaeth byd.

Daw'r llwyddiant fisoedd wedi iddo gorfod cael llawdriniaeth at gyflwr oedd â'r potensial i ddod â'i yrfa i ben.

Mae'n dweud ei fod bellach yn anelu at dorri record byd ei hun wrth gystadlu yng Ngemau Paralympaidd 2028.

Fe gipiodd y Cymro 34 oed y fedal aur yn New Delhi ddydd Sul gyda thafliad 16.44m o hyd - ei bumed ymgais yn y rownd derfynol.

Yr athletwr o Kuwait, Faisal Sorour, oedd yn ail ac Edenilson Floriani o Frasil wnaeth ennill y fedal efydd.

"Mae'n eithaf swreal, i fod yn onest," dywedodd Davies wrth BBC Sport.

"Mae Faisal yn dod yn ei flaen ac mae wedi bod yn fy herio, ond dydw i heb allu ymateb iddo yn y blynyddoedd diwethaf.

"Mae'n teimlo'n dda i fod yn ôl ond rwy'n teimlo bod gymaint yn fwy eto i ddod."

Aled Siôn Davies yn cystadlu yng Ngemau Olympaidd Paris y llynedd

Roedd Davies yn anelu at gipio'i bedwaredd medal aur yn olynol yn y Gemau Paralympaidd y llynedd, ond bu'n rhaid bodloni ar fedal arian tu ôl i Sorour.

Ers 2022 roedd wedi dioddef poen yng nghesail y morddwyd (groin) oherwydd cyflwr o'r enw Osteitis Pubis, sy'n datblygu o ganlyniad i or-hyfforddi.

"Wedi torcalon y llynedd, a phoen y pedair, pum mlynedd diwethaf oherwydd fy anafiadau, wnes i dderbyn yn y diwedd bod angen ambell atgyweiriad," dywedodd.

"Bu'n rhaid ail-greu fy nghlun, a ges i wybod efallai na fyswn ni'n dychwelyd i'r un safon â ble o'n i.

"Rwy' wedi gwneud hynny. Rwy' wedi dychwelyd, ailgodi popeth yn dawel bach ac rwy' wedi dod yma a chystadlu eto.

"Rwy'n anelu ar gyfer [Gemau Olympaidd 2028 yn] LA. Rwyf am dorri fy record byd."