Gweithiwr Heddlu De Cymru wedi'i arestio yn Cyprus
- Cyhoeddwyd
Cafodd Christopher Browning ei arestio yn Cyprus mewn cysylltiad â damwain ffordd angheuol
Mae gweithiwr gyda Heddlu De Cymru wedi cael ei arestio yng Nghyprus mewn cysylltiad â damwain ffordd angheuol.
Cafodd Christopher Browning ei arestio yn dilyn damwain ger tref Esentepe yng ngogledd Cyprus yn oriau mân dydd Iau, 2 Medi.
Bu farw dyn lleol, 58, a oedd yn gyrru beic modur, yn y fan a'r lle.
Ei enw oedd Bülent Güzelkeskin yn ôl ffynonellau lleol.
Dywedodd yr heddlu yng ngogledd Cyprus fod Mr Browning wedi'i arestio ar amheuaeth o yfed a gyrru ac eu bod wedi cymryd ei basbort oddi arno.
Yn ôl adroddiadau yn y cyfryngau lleol, fe ymddangosodd gerbron barnwr yn Famagusta ac mae bellach wedi ei gadw yn y ddalfa.
Dywedodd llefarydd ar ran Heddlu De Cymru: "Gallwn gadarnhau ein bod yn ymwybodol bod aelod o staff Heddlu De Cymru wedi'i arestio yng Nghyprus.
"Ni allwn ddweud mwy ar hyn o bryd."