Dyn 46 oed yn cael ei ladd wedi gwrthdrawiad yng Nghorris
- Cyhoeddwyd
Mae plismyn wedi diolch i deithwyr am eu hamynedd wedi i'r ffordd fod ar gau am oriau
Dywed Heddlu'r Gogledd bod dyn 46 oed wedi marw wedi gwrthdrawiad ar ffordd yr A487 yng Nghorris.
Cafodd y gwasanaethau brys eu galw i ymyl y Ganolfan Grefft ychydig cyn 12.20 ddydd Sul wedi gwrthdrawiad rhwng dau feic modur.
Er gwaethaf ymdrechion yr heddlu, Ambiwlans Awyr Cymru, y Gwasanaeth Ambiwlans ac aelodau o'r cyhoedd bu farw un beiciwr modur yn y fan a'r lle.
Roedd y ffordd ar gau gydol y prynhawn.
Dywedodd y Sarjant Raymond Williams o Uned Blismona'r Ffyrdd: "Rwy'n cydymdeimlo'n fawr â theulu y beiciwr modur sy'n cael eu cefnogi gan swyddog arbenigol yn ystod y cyfnod anodd hwn.
"Ry'n yn annog unrhyw dystion neu unrhyw un sydd â lluniau dash cam i gysylltu â ni.
"Ry'n hefyd yn diolch i deithwyr am eu hamynedd tra bu'r ffordd ar gau."