Bethan Rhys Roberts yn ennill dwy wobr BAFTA Cymru

Enillodd Bethan Rhys Roberts y wobr am y cyflwynydd gorau yn ogystal â gwobr abennig Siân Phillips am ei chyfraniad i'r byd teledu

Mae un o newyddiadurwyr a chyflwynwyr amlycaf Cymru wedi derbyn dwy o brif wobrau seremoni flynyddol BAFTA Cymru nos Sul.

Fe gadarnhaodd BAFTA ym mis Medi eu bod yn anrhydeddu Bethan Rhys Roberts eleni gyda Gwobr Siân Phillips - gwobr sy'n cydnabod cyfraniad arwyddocaol unigolyn o Gymru i'r byd ffilm neu deledu.

Ond mae prif gyflwynydd Newyddion S4C, sydd hefyd yn cyd-gyflwyno rhaglenni Post Prynhawn a Hawl i Holi ar Radio Cymru, hefyd wedi cael y wobr am y cyflwynydd gorau, am ei gwaith ar noson ganlyniadau etholiad cyffredinol y llynedd.

Y cyflwynwyr eraill ar y rhestr fer oedd y cogydd Chris Roberts, y ddawnswraig Amy Dowden, a Kristoffer Hughes am y gyfres Marw Gyda Kris.

Enillodd y gyfres honno, am draddodiadau'n ymwneud â marwolaeth mewn gwahanol rannau o'r byd, y wobr am y gyfres ffeithiol orau.

Mewn anerchiad yn y seremoni yng Nghanolfan Gynadleddau Rhyngwladol Casnewydd, dywedodd Bethan Rhys Roberts bod "newyddiadura yn newid ar gyflymdra aruthrol", gyda "lluniau, tystiolaeth ac ymateb yn syth ar ein ffonau o unrhyw le yn y byd".

Mae'n amhosib darogan, dywedodd, effaith deallusrwydd artiffisal sy'n "gyffrous" ac yn "ddychrynllyd" ar yr un pryd.

"Mewn byd sy'n pegynnu'n gynyddol, yn llawn adroddiadau croestynnol, mae gohebu diduedd a dadlau teg yn bwysicach nag erioed," fe rhybuddiodd," yn enwedig wrth i ni edrych ymlaen at ambell stori fawr iawn yma yng Nghymru a thramor."

Ychwanegodd: "Rwy'n gobeithio bod y wobr yma'n ysgogi newyddiadurwyr ifanc, a menywod yn arbennig, i fynnu ffeithiau, i graffu ac i herio."

Russell T Davies oedd enillydd gwobr arbennig arall y noson

Roedd yr awdur a'r cynhyrchydd Russell T Davies hefyd yn gwybod wrth gyrraedd y seremoni y byddai'n gadael gyda thlws nos Sul.

Fe dderbyniodd yntau wobr am Gyfraniad Neilltuol i'r Byd Teledu, a hynny, medd BAFTA, am "dorri tir newydd yn y byd drama LGBTQIA+" dros ddau ddegawd.

Martin Thomas yn annerch y seremoni wedi i Deian a Loli gipio'r wobr am y rhaglen blant orau

Roedd yn hysbys ers cyhoeddi'r enwebiadau mai cynhyrchiad Cymraeg fyddai'n cipio'r wobr am y rhaglen blant orau, gan mai rhaglenni ar gyfer S4C oedd y tair ar y rhestr fer.

Nid am y tro cyntaf, Deian a Loli ddaeth i'r brig - Mabinogi-ogi a PwySutPam? oedd y rhaglenni eraill a gafodd eu henwebu.

Sion Daniel Young (ar y dde) oedd enillydd y wobr am yr actor gorau am ei ran yn Lost Boys and Fairies

Cyfres ddrama BBC Cymru, Lost Boys and Fairies, gafodd y nifer fwyaf o enwebiadau eleni, sef saith, ac fe roedd yn fuddugol mewn pump o'r categorïau, gan gynnwys y Ddrama Deledu Orau.

Daf James oedd yr Awdur Gorau, Sion Daniel Young oedd yr Actor Gorau, James Kent oedd y cyfarwyddwr ffuglen gorau ac roedd yna gydnabyddiaeth i Danielle Palmer am ei gwaith golygu.

Aeth wobr y categori Newyddion a Materion Cyfoes i raglen BBC Wales Investigates, Unmasked: Extreme Far Right, oedd yn ganlyniad blwyddyn o ymchwilio'n gudd i'r grŵp Patriotic Alternative.

Roedd y rhestr fer ar gyfer y wobr hon hefyd yn cynnwys rhaglen Newyddion S4C am y prifathro a'r pidoffeil, Neil Foden a rhaglen Y Byd ar Bedwar ar achos a chwymp y cyn-gyflwynydd newyddion Huw Edwards.

Luned Tonderai oedd yr enillydd yn y categori Cyfarwyddwr: Ffeithiol am y gyfres Miriam: Death of a Reality Star.

Anna Maxwell Martin oedd yr Actores Orau eleni am ei pherfformiad yn y gyfres Until I Kill You.

Roedd yna ddwy wobr i The Golden Cobra - y rhaglen adloniant orau a'r wobr Torri Trwodd i'r cynhyrchwyr.

Enillodd y ffilm Mr Burton wobrau am sain, a ffotograffiaeth a goleuo, Helmand: Tour of Duty oedd y ddogfen unigol orau, a Mauled By a Dog oedd y Ffilm Fer Orau.

Dywedodd Garmon Rhys, cyfarwyddwr dros dro BBC Cymru: "Llongyfarchiadau mawr iawn i bawb sydd wedi cipio gwobr BAFTA Cymru eleni.

"Rydym ni mor falch o gynyrchiadau BBC Cymru a ddaeth i'r brig ac yn diolch i'r holl griwiau talentog am greu cynnwys gwych sy'n difyrru cynulleidfaoedd ar draws Cymru a thu hwnt."