Ysgol Abersoch: Ailedrych ar y penderfyniad i'w chau

Roedd yr ysgol i fod i gau ar 31 Rhagfyr, 2021

Bydd cynghorwyr yn edrych eto ar benderfyniad dadleuol i gau Ysgol Abersoch yng Ngwynedd.

Ddiwedd mis Medi pleidleisiodd y cabinet yn unfrydol dros gau'r ysgol ar 31 Rhagfyr eleni, er bod nifer o bobl wedi gwrthwynebu hynny yn ystod cyfnod ymgynghori.

Roedd pryderon am effaith cau'r ysgol ar yr iaith Gymraeg yn y pentref.

Nawr mae tri aelod o'r cyngor - Beth Lawton, Alwyn Gruffydd ac Elwyn Jones - wedi cwestiynu'r penderfyniad, gan godi rhai pwyntiau na chafodd eu hystyried, yn ôl y tri.

Bydd y mater yn cael ei drafod ymhellach gan y Pwyllgor Craffu ar 21 Hydref.

'Anghywir a chamarweiniol'

Nid oes gan y Pwyllgor Craffu Addysg a'r Economi yr hawl i wyrdroi'r penderfyniad, ond os yw'r pwyntiau sy'n codi yn y cyfarfod yn rhai dilys, gall y pwyllgor gyfeirio'r penderfyniad yn ôl i sylw'r cabinet.

Mae'r materion a godwyd ganddynt yn cynnwys:

• Honiadau bod yr adroddiad ar ddyfodol yr ysgol yn "anghywir ac yn gamarweiniol" yn nhermau ei "effaith ar y gymuned", ac ar yr iaith Gymraeg;

• Methiant i gymryd tai a swyddi lleol i ystyriaeth, gyda gwesty newydd yn y pentref yn addo creu 40 o swyddi, a bod tir yn cael ei glustnodi ar gyfer 15 o dai ym Mryn Garmon.

Maent hefyd yn cwestiynu cau'r ysgol yng nghanol y flwyddyn academaidd, gan hawlio y bydd yn ddryslyd i blant; yn cael "effaith negyddol ar eu haddysg", ac nad oedd eglurhad rhesymegol tu ôl i'r penderfyniad.

Roedd Cymdeithas yr Iaith yn chwyrn yn erbyn cau'r ysgol, gan ddweud bod y cyngor yn "tanseilio ei bolisïau tai ac iaith trwy gefnu ar Abersoch", ac maent wedi croesawu'r ffaith bod y mater wedi cael ei alw i mewn am ystyriaeth gan y pwyllgor craffu.

Dywedodd llefarydd ar ran y Gymdeithas: "Gofynnwn i'r pwyllgor wahodd cynrychiolwyr o blith llywodraethwyr yr ysgol i'w hannerch am eu cynlluniau cyffrous ar gyfer dyfodol yr ysgol, a gofynnwn i'r pwyllgor argymell fod y cabinet yn ailystyried cydweithio gyda'r partneriaid lleol brwd hyn yn hytrach na chefnu ar gymuned leol sydd mewn angen."