Gwrthwynebiad cryf i gynllun tai newydd yn Llanfairpwll

Mae pryderon y bydd mwy o draffig o gwmpas y stad yn Llanfairpwll

Mae yna wrthwynebiad mawr ar stad dai Y Garnedd yn Llanfairpwll ym Môn i godi 27 o dai fforddiadwy ar dir glas ger y stad.

Yn ôl gwrthwynebwyr mae'r tir a'r cynllun yn hollol anaddas ac maen nhw'n poeni y bydd yna broblemau traffig wrth i nifer y tai ddyblu.

Ond yn ôl y datblygwyr DU Construction o Gaergybi mae angen mawr am y tai ychwanegol.

Fe fyddai'r cartrefi yn cael eu codi ar gyfer Cyngor Sir Ynys Môn - dywedodd llefarydd ar ran y cyngor bod "gwir angen" tai fforddiadwy ar yr ynys.

Y bwriad yw codi'r tai ar dir glas ger stad Y Garnedd yn Llanfairpwll

Ond mae gan trigolion lleol sawl pryder ynglŷn a'r cynllun. Dywedodd yr Athro Alan Sior nad problemau traffig yn unig fyddai'n dod o ehangu'r stad.

'Mae problemau traffig yn dod trwy ddyblu'r niferoedd o dai sydd o gwmpas," meddai.

"Ond mae'r tir ei hunan yn debyg o gael llifogydd ac yn y blaen, a mi fydd 'na broblemau enfawr yn tarddu o hynny."

Ychwanegodd Gwyn Thomas bod cynllun y cyngor yn hollol anaddas.

"Y peth cyntaf, ac sy'n hollol bwysig i'w ddweud, ydi bod y datblygiad neu'r cais arfaethedig yma y tu allan i ffin ddatblygu Llanfairpwll," dywedodd.

"Os y caniateir mi fydd yn gosod cynsail peryg iawn i'r cyngor."

Dyw trigolion y stad ddim am weld tai yn cael eu codi yma

Prif bryder Gwyn Thomas yw'r problemau allai godi wrth i fwy o geir deithio ar hyd strydoedd cul y stad.

"Argument mwyaf sydd gen i ydi cymaint mwy o draffig fydd yn dod ffordd hyn - mae'r gornel 'ma fyny yn fan hyn yn broblem ofnadwy… mae'r lon mor gul.

"Dwni'm pe tase rhywun isio ambiwlans neu fire engine neu rywbeth. Sa'n impossible yn enwedig efo gymaint o geir sydd yn fan hyn rŵan, ac os oes 'na 27 o dai extra yn dod fyny mi fydd 'na fwy o geir o lawer wedyn."

'Annioddefol'

Mae Brenda Roberts yn byw ger y fynedfa i'r cae lle bwriedir codi'r tai, ac mae hi'n poeni'n arw.

'Dwi ddim yn gweld sut gall lorïau mawr basio ffordd hyn a bydd yn rhaid i fi chwilio am rywle arall i barcio fy nghar," meddai.

Mae Brenda Roberts yn byw ger mynedfa'r cae lle fyddai'r tai yn cael eu hadeiladu

"Mi fydd y lorïau mawr yn pasio heibio ffenast fy lolfa a bydd y sŵn yn annioddefol a fyddan nhw yn agor y draeniau 'ma.

"Dwi ddim yn gwybod sut ga'i fynediad at fy nhŷ, ac yn fwy na'r cwbl fedrai ddim byw yma tra bod hyn yn mynd ymlaen 'na wedyn… [byddai'n] annioddefol."

Ond mae'r datblygwyr yn mynnu bod y safle arfaethedig yn addas ar gyfer codi tai fforddiadwy.

Mewn datganiad dywedodd llefarydd ar ran DU Construction: "Mae yna 101 ar y Rhestr Tai Teg yn aros i gael tŷ fforddiadwy yn Llanfairpwll, mae'r rhan fwyaf angen tai dwy a thair llofft ac mae nhw i gyd yn bobl lleol."

Ychwanegwyd y dylid datblygu ar y safle ger Y Garnedd oherwydd nad oes yna unrhyw safleoedd addas eraill ar gael i ddatblygu yn Llanfairpwll.

Nodwyd hefyd bod ymchwil yn dangos bod y cae yn addas oherwydd y mynediad a bod yna ddim perygl o lifogydd.

'Dan ni isio cadw hwn yn dir glas'

Ond dydy Medwyn Roberts, un arall o drigolion stad Y Garnedd, ddim yn derbyn mai dyma'r lle iawn i godi tai.

"Mae'r gymuned wedi sicrhau y tir glas fan hyn ers dros 50 mlynedd - does 'na ddim datblygiad wedi bod," meddai.

"Yr unig beth sydd wedi cael ei wneud yma yn yr amser dwi yma ydi y fynwent newydd reit wrth ymyl y lle a chae ffwtbol dros ffin i'r cae yn fan hyn."

Mae Medwyn Roberts am gadw'r ardaloedd o dir glas yn Llanfairpwll

"Mae pawb isio cartref - roeddwn i 'run peth pan oeddwn i'n ifanc fy hun - ond ddim ar y cae yma.

"Dan ni isio cadw hwn yn dir glas. Mae'r pentre' yma wedi cael ei lenwi efo tai."

Dywedodd llefarydd ar ran Cyngor Sir Ynys Môn: "Mae ein Gwasanaeth Tai yn arwain ac yn cydweithio ar amryw o gynlluniau gyda'r bwriad o ddarparu tai fforddiadwy, gydag amrywiaeth o ddeiliadaeth, sydd wir eu hangen ar yr Ynys, ar gyfer trigolion lleol.

"Byddai'r cynllun arfaethedig yma yn un enghraifft o hyn. Ni fyddai'n briodol gwneud unrhyw sylw pellach hyd nes bydd y broses statudol cynllunio wedi ei gwblhau."