Swyddog heddlu'n rhan o ddamwain padlfyrddio Hwlffordd

Roedd tri padlfwrdd i'w gweld yn lle bu'r digwyddiad "torcalonnus" yn Hwlffordd

Swyddog heddlu oedd un o'r bobl fu'n rhan o ddamwain padlfyrddio yn Hwlffordd ddydd Sadwrn, meddai Heddlu De Cymru.

Bu farw tri padlfyrddiwr ac mae un arall yn parhau mewn cyflwr difrifol yn yr ysbyty ar ôl mynd i drafferthion mewn afon yn Sir Benfro.

Cafodd pump arall o'r un grŵp eu hachub yn ddi-anaf.

Mae teyrngedau wedi eu rhoi i'r dyn fu farw, Paul O'Dwyer, ond nid yw enwau'r ddwy fenyw fu farw wedi eu cadarnhau eto.

Nid yw aelodau eraill y grŵp wedi eu henwi'n swyddogol eto chwaith.

Mae'r Gangen Ymchwilio i Ddamweiniau Morol (MAIB) wedi cadarnhau eu bod yn cynnal "asesiad cychwynnol" i'r digwyddiad.

Roedd blodau i'w gweld ger y safle fore Llun

Cafodd y gwasanaethau brys eu hanfon i'r digwyddiad ger Stryd y Cei am tua 9:00 fore Sadwrn.

Roedd 20 swyddog heddlu a 30 diffoddwr tân yn rhan o'r chwilio, yn ogystal â thechnegwyr achub dŵr arbenigol.

Dywedodd yr heddlu fod yr afon yn llifo'n uchel ac yn gyflym adeg y digwyddiad, ar ôl glaw trwm.

Ddydd Sul, dywedodd y Ditectif Brif Arolygydd Jonathan Rees nad oedden nhw am gyhoeddi manylion pellach am tro, ond dywedodd bod y chwilio ar ben, ac nad oedd unrhyw un arall ar goll.

Bu farw Paul O'Dwyer yn y digwyddiad fore Sadwrn

Roedd Matthew Crowley - sy'n cynrychioli Aberafan a Dwyrain Sandfields ar Gyngor Castell-nedd Port Talbot - yn adnabod Mr O'Dwyer am y rhan fwyaf o'i oes.

Mr O'Dwyer oedd "bywyd ac enaid y parti, o oedran ifanc iawn," meddai, gan ychwanegu ei fod bob amser wedi bod yn "frwd dros chwaraeon".

"Roedd yn ymwneud â syrffio, padlfyrddio, sgïo, unrhyw beth i'w wneud â dŵr," meddai Mr Crowley.

Mae'r Prif Weinidog Mark Drakeford wedi dweud bod ei "feddyliau gyda'r teuluoedd a'r ffrindiau sydd wedi colli anwyliaid yn dilyn y drasiedi dorcalonnus yma".

Dros y penwythnos, dywedodd yr heddlu bod aelod o'r cyhoedd wedi neidio i mewn i'r afon i geisio achub y padlfyrddwyr, ond fe lwyddodd i ddod allan o'r dŵr yn ddiogel.

Roedd y dŵr yn Afon Cleddau Wen yn parhau'n uchel ddydd Sul

Dywedodd Natasha Williams fod ei mab hi Joel, 20, wedi neidio i mewn i'r afon pan welodd fod y padlfyrddwyr mewn trafferthion.

"Fe welodd e Paul gyntaf a cheisio cael rhaff iddo, ac wrth iddo geisio cael Paul fe welodd e ddynes yn dod tuag ato," meddai.

"Fe roddodd e'r rhaff i ddyn, a mynd i mewn ar ôl y ferch, yna rhoi CPR tan i'r gwasanaethau brys gyrraedd."

Ychwanegodd Natasha fod Joel yn nofiwr cryf, ac felly er i bobl ei rybuddio i beidio â mynd i'r dŵr, fe neidiodd i mewn beth bynnag.

"Roedd e yn y dŵr am ryw bum munud, ac yna'n dweud ei fod wedi gwneud CPR am ryw dri i bum munud," meddai Natasha.

"Doedden ni ddim wir wedi sylweddoli beth wnaeth e... tan i ni weld [y newyddion] y noson honno."

Cafodd gwasanaethau brys eu galw i'r digwyddiad fore Sadwrn

Roedd y padlfyrddwyr yn aelodau o grŵp padlfyrddio o dde Cymru a chwmni Salty Dog Co., yn ôl asiantaeth newyddion PA.

Cafodd nifer o rybuddion am dywydd garw eu cyhoeddi gan y Swyddfa Dywydd dros y penwythnos.

Dywedodd un fenyw wrth asiantaeth newyddion PA ei bod hi wedi penderfynu peidio cymryd rhan yn y padlfyrddio fore Sadwrn am ei bod hi'n poeni am y tywydd.

Roedd Stryd y Cei ar gau am rai oriau ddydd Sadwrn

Dywedodd y cynghorydd tref Thomas Tudor fod Afon Cleddau Wen yn "beryglus" a bod cyflymder y dŵr yn "cynyddu llawer" ar ôl glaw trwm.

"Mae'r gymuned yn drist iawn," meddai.