Babi fu'n fyw am 45 munud 'wedi marw o waedlif difrifol'

Roedd Chris ac Ellie James, rhieni Callum, wedi codi pryderon am y gofal a gafodd Ms James yn ystod ei genedigaeth

Bu farw babi newydd-anedig yn dilyn colled gwaed enfawr yn ystod ei enedigaeth, yn ôl crwner.

Ganed Callum James yn Ysbyty Glangwili yng Nghaerfyrddin ym mis Mai 2016 - dim ond am 45 munud y bu fyw.

Dywedodd y crwner bod Callum "wedi marw o ganlyniad i sioc hypofolemig a achoswyd gan golled acíwt a difrifol o waed" yn ystod ei enedigaeth.

Cofnododd Paul Bennett, uwch grwner dros dro Sir Gaerfyrddin a Sir Benfro, gasgliad naratif.

Dywedodd Mr Bennett fod arbenigwyr wedi dweud wrth y cwest fod y gwaedlif "yn sydyn ac yn acíwt ac unwaith iddo ddigwydd mai ychydig a allai fod wedi ei wneud i'w achub".

Cwest 'anodd'

Er bod y teulu wedi codi rhai pryderon ynghylch argaeledd monitorau calon ffoetws, dywedodd y crwner nad oedd yr un o'r tystion arbenigol yn feirniadol o'r ddarpariaeth.

Dywedodd Mr Bennett ei fod wedi bod yn gwest "anodd" a diolchodd i rieni Callum, Ellie a Chris James, am eu "dewrder".

"Ni ellir dychmygu pa mor drallodus oedd Mr a Mrs James yn teimlo pan ddywedwyd wrthynt nad oedd eu mab bach wedi goroesi," meddai.

Rhoddwyd achos meddygol marwolaeth fel sioc hypofolemig a gwaedlif.