Ai dyma'r flwyddyn i Elfyn Evans?

  • Cyhoeddwyd
elfynFfynhonnell y llun, Getty Images

Mae'r tymor ralïo newydd yn dechrau ym Monte Carlo ar ddydd Iau 20 Ionawr, ac yn y brif gystadleuaeth mae'r Cymro Elfyn Evans yn anelu i fod yn bencampwr byd.

Gorffennodd Elfyn yn yr ail safle yn y bencampwriaeth yn 2020 ac yn 2021 - tu ôl i Sébastien Ogier ar y ddau achlysur. Ond gydag Ogier yn hanner ymddeol eleni ac ond yn cymryd rhan mewn rhai o'r rasys mae'n golygu na fydd y Ffrancwr yn gallu ennill ei nawfed tlws.

Felly, beth yw'r newidiadau eleni?

"Y newid mawr eleni yw'r ceir newydd - maen nhw wedi mynd yn hybrid am y tro cyntaf erioed," meddai'r gohebydd ralïo, Emyr Penlan. "Felly mae'r ceir lot trymach oherwydd bod batris ym mhob car, sydd wrth gwrs yn effeithio ar falans y car."

emyrFfynhonnell y llun, S4C
Disgrifiad o’r llun,

Mae Emyr wedi bod yn ohebydd ralïo ers 1999

"Ond wrth gwrs i gyd-fynd efo'r pwysa ychwanegol mae mwy o bŵer - mae tua 138bhp yn ychwanegol sy'n gwneud cyfanswm o rhyw 500bhp, felly oherwydd y pŵer yma bydd y ceir ddim yn handlo cystal â llynedd.

"Ni wedi gweld Elfyn, Craig Breen a Thierry Neuville i gyd yn crasho'r car yn ymarfer cyn i'r tymor gychwyn. Falle bod e'n beth da bod Elfyn wedi cael cnoc cyn i'r tymor ddechrau - mae e wedi ei wneud nawr."

Y ddau Seb ym Monte Carlo

Mae rali cynta'r tymor eleni yn ne Ffrainc, ble bydd Elfyn yn wynebu dipyn o her gan ddau Ffrancwr.

"Yr unig broblem sydd da fe (Elfyn) yw bod y pencampwr byd wyth gwaith a'r pencampwr byd naw gwaith, Sébastien Ogier a Sébastien Loeb, yn y ras - nhw yw'r ddau sydd efo'r form yn rali Monte Carlo.

"Mae Ogier wedi ymddeol mwy neu lai ac yn sôn am rasio am hanner y tymor eleni. Mae Loeb newydd wneud y Dakar Rally yn Saudi Arabia ac bydd e, fel Ogier, yn gwneud ambell rali eleni - mae e'n ffan mawr o rali Monte Carlo."

Nid yw’r post yma ar X yn gallu ymddangos yn y porwr. Os gwelwch yn dda defnyddiwch Javascript neu geisio eto ar borwr gwahanol.Gweld y cynnwys gwreiddiol ar X.
Nid yw'r BBC yn gyfrifol am gynnwys safleoedd allanol
I osgoi neges X gan TOYOTA GAZOO Racing WRT

Caniatáu cynnwys X?

Mae’r erthygl yma’n cynnwys elfennau sydd wedi eu darparu gan X. Gofynnwn am eich caniatâd cyn eu llwytho, oherwydd fe allai wneud defnydd o cwcis a thechnolegau eraill. Efallai y byddwch am ddarllen polisi cwcis X, dolen allanol a pholisi preifatrwydd, dolen allanol cyn derbyn. I weld y cynnwys yma dewiswch ‘derbyn a pharhau’.

Nid yw'r BBC yn gyfrifol am gynnwys safleoedd allanol
Diwedd neges X gan TOYOTA GAZOO Racing WRT

Y car gorau?

Un cwestiwn fydd yn cael ei ofyn yw os ydy Toyota, y car mae Elfyn yn ei yrru, wedi gwneud eu gwaith cartref dros y Gaeaf? Ai Huyndai sydd wedi paratoi orau? Neu ai M-Sport Ford yw'r car i guro?

"Mae lot yn dod lawr i'r gyrwyr wrth gwrs, ond mae'r ceir yn hollbwysig" meddai Emyr. "A bob tro ni'n gweld newid yn y rheolau, Ford fel arfer sy'n dod mas o'r bocs cyflyma ar ddechrau'r tymor ac mae Toyota a Huyndai yna'n dal lan gyda nhw yn ystod y tymor."

elfynFfynhonnell y llun, Getty Images
Disgrifiad o’r llun,

Elfyn yn rasio yn Rali'r Ffindir, 3 Hydref, 2021

Y gystadleuaeth

Pwy yw'r bygythiadau i Elfyn? Yn ôl Emyr mae sawl un all gynnig sialens iddo.

"Ott Tänak alle di ddadle yw'r gyrrwr cyflyma, ond mae e wedi cael gymaint o anlwc - mae e'n mynd off y ffordd lot. Mae wedi bod yn bencampwr byd yn y gorffennol a dwi'n credu mai rhwystredigaeth yw pam fod e'n cael damweiniau - mae fel bod e'n trio rhy galed."

Disgrifiad,

Elfyn Evans cyn y tymor newydd

Ond nid Tänak o Estonia yw'r unig fygythiad yn ôl Emyr.

"Thierry (Neuville) ar bapur efallai yw'r un cyflyma, ond fel Tänak mae'n gyrru i Huyndai, ac mae'n dibynnu lot ar y car.

"O fewn tîm Elfyn yn Toyota mae Kalle Rovanperä, gyrrwr 21 oed o'r Ffindir sy'n gwella gyda phob rali. Gellir dadle bod y gyrwyr ifanc mewn gwell safle i addasu i'r ceir newydd na Elfyn, sydd wedi bod mewn math arall o geir drwy gydol ei yrfa. Mae Kalle am fod yn bencampwr byd rwy'n credu, ac mae jest yn fater o pryd fydd hynny."

elfynFfynhonnell y llun, Getty Images
Disgrifiad o’r llun,

Elfyn yn y canol, gyda Kalle Rovanpera ar y chwith a Sébastien Ogier ar y dde

"Mae Craig Breen wedi mynd nôl i Ford, ac os mai Ford fydd gan y car gorau fe all e fod yn cystadlu hefyd."

Elfyn yn Bencampwr Byd?

Gyda Elfyn yn gorffen yn ail ddwywaith tu ôl i Ogier dros y ddwy flynedd diwethaf, beth sy'n rhaid i Elfyn wneud yn wahanol eleni i gipio'r bencampwriaeth?

"Dwi ddim yn meddwl bod angen i Elfyn wneud dim yn wahanol eleni i be' mae wedi ei wneud dros y ddau dymor d'wetha - os wneith e hynny bydd e mewn lle da i ennill."

Felly, ydy Emyr yn meddwl mai Elfyn fydd yn ennill y bencampwriaeth?

"Ydw, rwy'n ffyddiog y bydd Elfyn yn ei gwneud e eleni, a blwyddyn nesa' gobeithio. Mae e mewn man da, wedi priodi diwedd blwyddyn d'wetha, teulu iach ifanc gartref, ac mae Toyota wedi edrych ar ei ôl e felly does dim unrhyw broblemau ariannol ganddo fe am weddill ei oes.

"Elfyn yw prif yrrwr Toyota nawr, sy'n golygu bod ganddo ddylanwad mawr ar y penderfyniadau sy'n ymwneud â'r car. Mae e'n gyfforddus ac mae'r pwysau off, a dwi'n credu daeth e i ben â hi eleni."

line

Hefyd o ddiddordeb:

Pynciau cysylltiedig