Galw ar Johnson i ymddiswyddo wedi adroddiad Sue Gray
- Cyhoeddwyd

Boris Johnson yn annerch aelodau Tŷ'r Cyffredin wedi cyhoeddiad casgliadau cychwynnol Sue Gray
Mae'r prif weinidog Boris Johnson yn wynebu galwadau i ymddiswyddo wedi i'r adroddiad cychwynnol i bartïon yn Downing Street gael ei gyhoeddi.
Dywedodd Sue Gray yn ei hadroddiad hir-ddisgwyliedig bod "diffyg arweiniad a doethineb" wedi bod mewn rhannau gwahanol o Rif 10 a Swyddfa'r Cabinet.
Ond ychwanegodd Ms Gray - yr uwch was sifil a fu'n ymchwilio i bartïon yn Downing Street - bod ymchwiliad Heddlu'r Met yn Llundain yn golygu "nad yw'n bosib ar hyn o bryd i ddarparu adroddiad ystyrlon" o'r digwyddiadau.
Daeth i'r casgliad bod 16 o bartïon wedi eu cynnal yn Downing Street yn y cyfnod clo, a bod yr heddlu'r ymchwilio i 12 ohonyn nhw.
Beth mae'r adroddiad yn ei ddweud?
Mae adroddiad Sue Gray wedi "cythruddo Aelodau Seneddol o bob lliw", medd ein gohebydd Catrin Haf Jones
Er ei fod wedi ei dalfyrru, mae adroddiad Sue Gray yn feirniadol o'r partïon yn Downing Street yn ystod y cyfnod clo.
Dywedodd yn yr adroddiad: "O ganlyniad i ymchwiliadau Heddlu'r Met, ac i beidio rhagfarnu proses ymchwilio'r heddlu, maen nhw wedi dweud wrthyf y byddai ond yn briodol i roi ychydig iawn o sylw i'r digwyddiadau ar y dyddiadau y maen nhw'n ymchwilio iddynt.
"Yn anffodus, mae hyn yn golygu fy mod wedi fy nghyfyngu yn yr hyn y gallaf ddweud am y digwyddiadau hynny, ac nid yw'n bosib darparu adroddiad ystyrlon yn datgan a dadansoddi'r wybodaeth ffeithiol yr wyf wedi medru ei gasglu."
Caniatáu cynnwys X?
Mae’r erthygl yma’n cynnwys elfennau sydd wedi eu darparu gan X. Gofynnwn am eich caniatâd cyn eu llwytho, oherwydd fe allai wneud defnydd o cwcis a thechnolegau eraill. Efallai y byddwch am ddarllen polisi cwcis X, dolen allanol a pholisi preifatrwydd, dolen allanol cyn derbyn. I weld y cynnwys yma dewiswch ‘derbyn a pharhau’.
Ond galwodd am "ddysgu gwersi arwyddocaol ar unwaith" yn sgil y partïon na ddylai fod wedi digwydd, gan ychwanegu nad oedd rhaid disgwyl tan ddiwedd ymchwiliad yr heddlu i hyn ddigwydd.
Meddai'r adroddiad: "Ni ddylai nifer o'r digwyddiadau yma fod wedi cael digwydd nac i ddatblygu yn y modd y gwnaethon nhw.
"Dyw yfed gormod o alcohol ddim yn briodol mewn gweithle ar unrhyw adeg. Rhaid cymryd camau i sicrhau fod gan bod adran o'r llywodraeth bolisi clir a chadarn i ddelio gydag yfed yn ormodol yn y gweithle."
'Llywodraeth yn wfftio'r gyfraith'
Wrth ymateb, dywedodd Arweinydd Plaid Cymru yn San Steffan, Liz Saville Roberts: "Mae ffars San Steffan wedi mynd i lawr i anhrefn lwyr yn yr wythnos diwethaf. Er gwaetha'r addewid o adroddiad llawn o'r digwyddiadau, mae'r diweddariad byr yma yn gadael llawer o gwestiynau heb eu hateb.
"Yn y cyfamser, dyw Heddlu'r Met ddim wedi rhoi rheswm digonol am sensro'r adroddiad.
"Yr hyn na ellid dadlau yn yr adroddiad yw hyn - tra bod teuluoedd yn galaru, staff ysbytai wedi ymlâdd, ffrindiau a phartneriaid wedi'u gwahanu am fisoedd, roedd y rhai ar lefel uchaf y llywodraeth yn wfftio'r gyfraith.
"Ni all Boris Johnson ddefnyddio ymchwiliad Heddlu'r Met fel esgus i oedi rhag ymddiswyddo. Ewch nawr!"
Ychwanegodd AS arall o Blaid Cymru, Hywel Williams, ei bod yn bryd i aelodau Ceidwadol y meinciau cefn "ddarganfod eu hesgyrn cefn" a diswyddo Mr Johnson.

Mae Jane Dodds a Liz Saville Roberts yn dweud na all Boris Johnson barhau fel Prif Weinidog
'Amhosib iddo arwain gyda hygrededd'
Yn ôl arweinydd y Democratiaid Rhyddfrydol Cymreig, Jane Dodds, mae'r adroddiad "glastwraidd yma'n siomedig eithriadol".
Dywedodd: "Mae pawb yn gwybod bod Boris Johnson wedi torri'r rheolau ac yna wedi dweud celwydd wrth y wlad.
"Mae'n bryd i aelodau Ceidwadol y Ceidwadwyr Cymreig yn San Steffan gyflawni eu dyletswydd i'w hetholwyr a sefyll o blaid parch trwy ddiswyddo Boris Johnson. Rhaid iddo fynd cyn iddo wneud mwy o niwed i'r wlad."
"Rhaid i Aelodau'r Senedd hefyd alw ar Johnson i ymddiswyddo."
Ychwanegodd: "Ni all y Prif Weinidog barhau i arwain ag unrhyw hygrededd o blith y boblogaeth, petai'n penderfynu rhygnu ymlaen."

Aelodau Tŷ'r Cyffredin cyn i Boris Johnson wneud ei ddatganiad brynhawn Llun
Mewn datganiad i aelodau Tŷ'r Cyffredin, dywedodd Boris Johnson ei fod yn derbyn casgliadau'r adroddiad.
"Mae'n ddrwg gen i am y pethau ni wnaethom, yn syml, yn gywir, a hefyd am y ffordd y mae'r mater hwn wedi cael ei drin," meddai.
Fe wnaeth addewid i ddysgu o gasgliadau cychwynnol Ms Gray a "datrys" diffygion o ran trefniadau rhedeg 10 Downing Street.
Ond mynnodd ei fod am ganolbwyntio ar wneud ei job a bod angen caniatáu i Heddlu'r Met gwblhau eu hymchwiliad.

Dadansoddiad Gohebydd Seneddol BBC Cymru, Elliw Gwawr:
Mae'n glir nad dyma'r adroddiad llawn yr oedd Sue Gray yn gobeithio ei gyhoeddi. Mae ymchwiliad yr heddlu wedi cyfyngu ar yr hyn yr oedd hi'n gallu ei gynnwys, ac o ganlyniad mae hi'n dweud nad yw'n bosib creu adroddiad ystyrlon.
Ond eto mae'r hyn sydd yno dal yn ddamniol, yn sôn bod yna fethiant i ddilyn y rheolau yr oedd gweddill y boblogaeth yn gorfod eu dilyn.
Yn pwysleisio'r gwahaniaeth rhwng yr ymddygiad yn Downing Street ac aberth pobl gyffredin yn ystod y cyfnod clo, mae hi'n dweud bod yna ddiffyg arweinyddiaeth, na ddylai'r digwyddiadau yma fod wedi digwydd, a bod yr ymddygiad yn anodd ei gyfiawnhau.

Mae'n cadarnhau bod yr heddlu yn ymchwilio i 12 digwyddiad gan gynnwys un yn fflat y prif weinidog.
A falle mai hyn sydd â'r potensial i fod yn fwyaf niweidiol i Boris Johnson. Nid digwyddiad gwaith oedd yn cael ei gynnal yn ei gartref ei hun.
Roedd yna ymddiheuriad gan Mr Johnson ond wnaeth o ddim cwympo ar ei fai, gan osgoi cwestiynau ynglŷn â'r digwyddiad yn ei fflat, drwy ddweud bod rhaid aros i'r ymchwiliad gwblhau.
Mi fydd y newidiadau i'r drefn yn Downing Street yn ddigon i blesio rhai aelodau Ceidwadol, ond mae nifer dal yn anhapus iawn.
Fe wthiodd y cyn Brif Weinidog Theresa May y gyllell i mewn pan ofynnodd i Mr Johnson a oedd o wedi methu â darllen y rheolau, ddim yn eu deall neu yn credu nad oedden nhw'n berthnasol iddo fo.
Dyw Boris Johnson ddim ar ei ffordd allan eto, ond nid yma ddiwedd y mater chwaith.

Eleri Brown, Pauline Dyment a Stephen Edwards
Yn Rhuthun ddydd Llun, dywedodd Eleri Brown bod " isio i bobl glywed y gwir fel mae hi wedi ffindio allan".
"O'n i'n ofni fyse ddim byd yn dod allan. Ond da iawn dwi'n meddwl."
Dywedodd Pauline Dyment: "Dwi jyst ddim yn coelio dim byd mae Boris Johnson yn dd'eud ar y funud. S'genna i ddim ffydd ynddo fo o gwbl."
Ond i Stephen Edwards, mae'n "anodd dod i benderfyniad" achos "'den ni ddim wedi clywed hanner y stori eto".
"Mae'r Met wedi dod i fewn so fydd raid i ni aros. Ond dwi'n meddwl mewn ffordd mae Boris wedi bod yn reit lwcus yn dydy o.
"Mae'r peth wedi mynd i ffwrdd am rai wythnosau. Yden ni'n mynd i weld y ffeithiau i gyd? Dwi'm yn gw'bod."
Pynciau cysylltiedig
Straeon perthnasol
- Cyhoeddwyd12 Ionawr 2022
- Cyhoeddwyd11 Ionawr 2022
- Cyhoeddwyd7 Ionawr 2022