Gwyntoedd cryfion yn effeithio ar Gymru a mwy i ddod

Rough seasLee McGrath

Roedd hi'n stormus ddydd Mercher ac mae disgwyl mwy o wyntoedd cryfion yn ystod y diwrnodau nesaf

Fe allai gwyntoedd cryfion o hyd at 100mya greu problemau yng Nghymru tan ddydd Gwener.

Mae'r Swyddfa Dywydd wedi uwchraddio eu rhybudd ynglŷn â Storm Eunice ddydd Gwener i oren.

O ganlyniad, mae darogan y bydd yn effeithio ar gyflenwadau trydan, creu difrod i gartrefi, llifogydd arfordirol a thrafferthion teithio.

Mae nifer o rybuddion llifogydd "byddwch yn barod" mewn grym gan Gyfoeth Naturiol Cymru.

Ddydd Mercher fe wnaeth Storm Dudley daro ardaloedd ar draws Cymru, gyda'r Swyddfa Dywydd yn rhybuddio y gallai olygu toriadau mewn cyflenwadau ynni, difrod i adeiladau a choed yn cwympo.

Am 17:00 brynhawn Mercher roedd gwyntoedd o 81mya yng Nghapel Curig, Sir Conwy.

Nid yw’r post yma ar Twitter yn gallu ymddangos yn y porwr. Os gwelwch yn dda defnyddiwch Javascript neu geisio eto ar borwr gwahanol.Gweld y cynnwys gwreiddiol ar Twitter.
Nid yw'r BBC yn gyfrifol am gynnwys safleoedd allanol
I osgoi neges twitter gan Cyfoeth Naturiol Cymru | Natural Resources Wales

Caniatáu cynnwys Twitter?

Mae’r erthygl hon yn cynnwys deunydd gan Twitter. Gofynnwn am eich caniatâd cyn llwytho unrhyw beth, gan y gallai Twitter ddefnyddio cwcis neu dechnoleg arall. Mae’n bosib eich bod am ddarllen polisi cwcis Twitter a pholisi preifatrwydd cyn derbyn. Er mwyn gweld y cynnwys dewiswch ‘derbyn a pharhau’.

Nid yw'r BBC yn gyfrifol am gynnwys safleoedd allanol

Dywedodd Ross Akers, Rheolwr Tactegol Cyfoeth Naturiol Cymru (CNC), bod ansicrwydd am gryfder y stormydd, ond mi all fod yn "sylweddol".

"Gallai'r gwyntoedd cryfion achosi ymchwydd llanw a thonnau mawr, all arwain at orlifo amddiffynfeydd llifogydd ar hyd yr arfordir," meddai.

"Rydym yn monitro'r sefyllfa'n agos iawn ond mae pryder, os daw'r rhagolygon yn wir, y byddwn yn debyg o weld effeithiau llifogydd sylweddol mewn sawl man ar hyd ein hardaloedd arfordirol.

Tegwen Morris

Mae Cyfoeth Naturiol Cymru'n rhybuddio unrhyw un mewn ardaloedd arfordirol i gymryd gofal ychwanegol

Cyngor Abertawe

Coeden wedi syrthio ym Mharc Underhill yn y Mwmbwls ddydd Mercher

"Gallai cyflymder y gwynt hefyd arwain at ddifrod mewn sawl ardal. Rydym yn annog gofal ac i bawb gadw llygad barcud ar ragolygon y tywydd a gwefan CNC am y rhybuddion llifogydd diweddaraf.

"Os ydych chi'n byw yn agos at, neu'n ymweld ag ardal arfordirol, byddwch yn ofalus iawn a chadwch bellter diogel oddi wrth lwybrau arfordirol a phromenadau oherwydd gall tonnau mawr eich ysgubo oddi ar eich traed neu gallwch gael eich taro gan falurion."

Mae'r gwynt wedi achosi difrod i do archfarchnad Tesco yng Nghaerdydd

Roedd 600 o gartrefi heb drydan yn Ystradgynlais brynhawn Mercher, ond roedd y cyflenwad yn ôl i bob un ond 100 erbyn 16:15.

Bu'n rhaid cau'r B4459 ym Mhencader, Sir Gâr ar ôl i goeden gwympo.

Cadarnhaodd Cyngor Abertawe fod coeden arall wedi syrthio ym Mharc Underhill yn y Mwmbwls.

Bu'n rhaid symud y gêm rygbi o dan 18 rhwng Caerdydd a Dreigiau Casnewydd o Barc yr Arfau i Ystrad Mynach wedi difrod i'r stadiwm yng Nghaerdydd.

Mae uchafswm cyflymder teithio ar Bont Britannia yn 30mya yn sgil y gwyntoedd.

Y Swyddfa Dywydd

Mae rhybudd oren ar gyfer dydd Gwener

Yn y cyfamser mae rhybudd oren wedi ei gyhoeddi dros Gymru gyfan ar gyfer Storm Eunice ddydd Gwener.

Mae'n bosib iawn y gallai'r gwyntoedd cryfion yma beryglu bywydau, meddai'r Swyddfa Dywydd.

Bydd y rhybudd yn para o 03:00 fore Gwener tan 21:00 yr hwyr.

Gallai effeithio ar gyflenwadau pŵer yn ôl llefarydd, ac ar drafnidiaeth o bob math.

Pynciau cysylltiedig

Straeon perthnasol