Modd rhoi gwallt affro i elusen drwy dechneg newydd

"Mae'n teimlo'n ysgafn iawn ar fy mhen! Dwi'n gobeithio y bydd hyn yn ysbrydoli pobl i roi arian a rhoi eu gwallt."

Roedd Poppy wedi treulio dros hanner ei hoes yn tyfu'i gwallt - a hynny ar gyfer yr ymweliad yma â'r siop trin gwallt.

Ers iddi fod yn bump oed, roedd Poppy wedi bod eisiau rhoi ei gwallt i elusen.

Dywedwyd wrthi o'r blaen na allai gwneuthurwyr wigiau weithio gyda gwallt affro oherwydd ei fod yn rhy fregus.

Ond dywedodd ei bod "wrth ei bodd" a hynny wedi i dechneg newydd olygu ei bod yn gallu cyfrannu o'r diwedd i Little Princess Trust.

'Rhan fawr o hunaniaeth'

Roedd Poppy wedi treulio dros hanner ei hoes yn tyfu'i gwallt

Yn ôl Poppy, sy'n 11 oed ac yn byw yn Rhondda Cynon Taf, roedd hi eisiau "helpu a bod yn hael".

"Mae'n bwysig rhoi gwallt affro oherwydd mae'n rhan fawr o hunaniaeth pobl," ychwanegodd.

Nid dim ond tyfu ei gwallt mae Poppy wedi bod yn ei wneud. Mae Poppy a'i rhieni wedi bod yn codi arian i'r elusen - dros £2,750 hyd yn hyn.

Mae'r Little Princess Trust yn darparu wigiau i blant sydd wedi colli gwallt tra'n cael triniaeth canser neu am resymau eraill.

Gall clymu wig unigol â llaw gymryd rhwng 30 a 60 awr - ac weithiau bydd angen hyd at 12 neu 14 o roddion gwallt unigol.

Cyn hynny, roedd yr elusen yn gwneud wigiau steil affro o wallt syth Ewropeaidd wedi'i steilio'n gyrliau tynn.

Poppy'n cael torri'i gwallt o'r diwedd, diolch i'r dull 'wefting'

Roeddwn nhw wedi methu dod o hyd i wneuthurwr wigiau a allai weithio gyda rhoddion affro. Yn y broses arferol o wneud wigiau, byddai gwallt affro yn torri'n hawdd.

Ond yn 2021, ar ôl gweithio gyda'r gwneuthurwyr wigiau o Lundain, Raoul, datblygwyd dull 'wefting', sy'n golygu y gall yr elusen nawr dderbyn gwallt affro.

'Gweithred anhunanol o garedigrwydd'

"Roedden ni eisiau rhoi'r dewis ychwanegol yna a sicrhau ein bod ni'n gallu rhoi wig o wallt affro - gwallt affro iawn," meddai Prif Weithredwr y Little Princess Trust, Phil Brace.

"Mae bob amser yn chwerwfelys oherwydd byddai'n well gennym beidio â gorfod cyflenwi'r wigiau hyn o gwbl.

"Mae yna ddigon o heriau gyda cholli gwallt i berson ifanc, heb orfod poeni a ydyn nhw'n cael y wig maen nhw ei eisiau."

Ychwanegodd eu bod wedi apelio'n ddiweddar am fwy o roddion gwallt affro gan ddisgrifio rhodd Poppy fel "gweithred anhunanol o garedigrwydd."

"Roedden ni eisiau rhoi'r dewis ychwanegol yna a sicrhau ein bod ni'n gallu rhoi wig o wallt affro," meddai Phil Brace

Gan ddiolch iddi nid yn unig am ei chyfraniad gwallt ond hefyd am ei hymdrechion codi arian, eglurodd mai nhw yw'r unig elusen sy'n darparu'r gwasanaeth yma i bobl ifanc yn y DU a'u bod yn gwbl ddibynnol ar waith gwirfoddolwyr sy'n codi arian a rhoddwyr.

"Rydyn ni'n ddyledus ac rydyn ni'n ddiolchgar iawn, iawn."

Roedd clywed y newyddion y gallai Poppy roi ei gwallt o'r diwedd yn "arbennig iawn", yn ôl ei mam, Beki Lee-Burrowes.

"Mae gwybod bod plentyn sy'n dioddef o ganser, sy'n cael amser erchyll yn ei fywyd; iddyn nhw gael mynediad at wallt sy'n eu cynrychioli nhw a'u hunaniaeth… mae bod yn rhan o hynny'n bwysig iawn i ni," meddai.

"Mae hi'n bendant yn 'hair-o'!"

Dywedodd Poppy y byddai'n hapus i dyfu a rhoi mwy o wallt yn y dyfodol

Dywedodd ei mam, Jessica Lee-Burrowes ei bod yn gobeithio y byddai stori ei merch yn arwain at fwy o bobl yn rhoi gwallt.

"Mae'n teimlo mor llethol ac rydyn ni mor falch ohoni a'r ffaith ei bod wedi cadw ato."

Ond nid dyma ddiwedd y daith i Poppy. Dywedodd ei bod yn barod i dyfu ei gwallt a rhoi eto.

"Alla i ddim aros i wneud hyn eto yn y dyfodol," meddai.

"Rwy'n falch iawn o'r hyn wnes i heddiw ac rwy'n gyffrous iawn!"