Cerddwraig wedi marw wedi gwrthdrawiad yn yr Wyddgrug

Mae'r heddlu yn Sir Y Fflint yn ymchwilio ar ôl i ddynes farw ar ôl bod mewn gwrthdrawiad gyda char yn yr Wyddgrug.

Dywed yr heddlu iddynt gael eu galw i'r digwyddiad ar yr A494 ychydig cyn 05:30 fore Gwener.

Cafodd y ddynes, gafodd ei tharo gan Skoda Octavia, ei chymryd i Ysbyty Maelor yn Wrecsam, lle bu farw yn ddiweddarach.

Dywedodd Sarjant Emlyn Hughes o Heddlu'r Gogledd eu bod yn awyddus i glywed gan unrhyw dystion a fu'n teithio ar hyd y ffordd ben bore ac a welodd dynes yn cerdded, i gysylltu â nhw.

"Hefyd rydym yn apelio am unrhyw un oedd yn yr ardal ac o bosib gyda deunydd dash-cam i gysylltu â ni."

Mae'r ffordd wedi bod ynghau yn ystod y dydd tra bod timau fforensig yn archwilio safle'r gwrthdrawiad.