Arwr Wrecsam, sydd â dementia i gael mynd i Wembley

Gareth Davies, wnaeth hefyd ennill tri chap i Gymru, yn dathlu'i ben-blwydd yn 70 oed gyda'i wyrion

Bydd un o arwyr Clwb Pêl-droed Wrecsam, sydd bellach yn byw â dementia, yn cael teithio i Wembley - diolch i berchnogion enwog y clwb.

Gwnaeth Gareth Davies 612 ymddangosiad i'r cochion ac yn ôl Ymddiriedolaeth y Cefnogwyr fe yw "capten mwyaf llwyddiannus y clwb".

Mae o bellach yn 72 oed ac yn byw mewn cartref gofal.

Mae'r clwb yn cefnogi'n llwyr ymgyrch yr ymddiriedolaeth i alluogi Mr Davies a'i deulu i fynd i Wembley.

Bydd y Dreigiau yn cystadlu yn Rownd Derfynol Tlws FA Lloegr yn erbyn Bromley ar 22 Mai.

'Wedi "troi i fyny" i'r clwb'

Mewn neges ar ei gyfrif Twitter dywedodd yr actor Hollywood, Ryan Reynolds, byddai o a'i gyd-berchennog, Rob McElhenney, yn "sicrhau bod Gareth yn cyrraedd Wembley yn gyfforddus".

Ychwanegodd bod Mr Davies wedi "troi fyny" i'r clwb yn y gorffennol ,"a byddwn ni yna iddo fo".

Dywedodd mab-yng-nghyfraith Mr Davies, Chris Braisdell, bod y teulu "wedi'i syfrdanu'n fawr".

"Mae'i frwydr gyda dementia yn galed, ond mae bob amser yn cofio'r hen ddyddiau da."

Dywedodd Mr Braisdell nad oedd ef na'i wraig, Kate yn gwybod o flaen llaw fod ymgyrch wedi'i lansio i helpu ei thad i fynychu'r gêm yn Llundain.

"Doedden ni ddim yn disgwyl cymaint o ymateb gan y cefnogwyr," meddai.

Dywedodd fod y taid i ddau wedi ymrwymo ei yrfa i Wrecsam a bod yr apêl yn dangos bod pobl yn ei weld fel "cyfle i ddiolch iddo am yr hyn y mae wedi'i wneud i'r clwb".

Ryan Reynolds a Rob McElhenney yw perchnogion CPD Wrecsam

Fel capten, arweiniodd Gareth Davies y clwb i bencampwriaeth y Drydedd Adran yn 1978, ac roedd yn rhan o'r tîm a sicrhaodd ddyrchafiad yn 1969-70.

Roedd hefyd yn gapten ar y clwb pan gyrhaeddon nhw rownd wyth olaf Cwpan FA Lloegr yn 1974 a 1978, rownd go-gynderfynol Cwpan Enillwyr Cwpanau Ewrop yn 1976 a rowndiau go-gynderfynol Cwpan y Gynghrair Bêl-droed yn 1978.