Arestio dyn ar amheuaeth o lofruddio menyw yn Sir Benfro

Cafodd plismyn eu galw i gyfeiriad yn Noc Penfro fore Gwener

Mae'r heddlu wedi arestio dyn 41 oed ar amheuaeth o lofruddio ar ôl dod o hyd i gorff menyw yn Sir Benfro.

Cafodd Heddlu Dyfed-Powys eu galw i gyfeiriad ar Military Road yn Noc Penfro fore Gwener.

Dywedon nhw fod y canfyddiad wedi golygu fod llawer o heddweision wedi bod yn yr ardal, gan gynnwys swyddogion arfog.

Nos Wener fe lansiwyd apêl am dystion.

Mae'r dyn a gafodd ei arestio yn parhau yn y ddalfa, a dywedodd yr heddlu nad ydyn nhw'n chwilio am unrhyw un arall mewn cysylltiad â'r digwyddiad.

Yn ôl Heddlu Dyfed-Powys mae nhw'n credu iddo fod yn rhan o gyfres o ddigwyddiadau difrod troseddol yn ardal Neyland yn gynharach yn y bore.

O ganlyniad mae swyddogion yn ceisio rhoi ei symudiadau at ei gilydd ac eisiau siarad ag unrhyw un oedd yn Neyland rhwng 06:00 a 06:45 a Doc Penfro rhwng 08:00 a 08:15 fore Gwener.

Disgrifir y dyn fel dyn chwe troedfedd o daldra, yn gwisgo siaced dywyll ac o bosib ar feic trydan lliw golau.