Y Rhyl: Difrod i awyren Red Arrows ar ôl i aderyn ei tharo

Cafodd yr awyren ei tharo gan aderyn yn ystod y Sioe Awyr

Mae awyren Red Arrows wedi ei difrodi ar ôl i aderyn ei tharo yn ystod Sioe Awyr Y Rhyl ddydd Sul.

Fe rannodd David Montenegro, un o swyddogion y Red Arrows, neges ar Twitter yn dweud bod peilot awyren y Red 6 "wedi ei ysgwyd ond yn iawn".

Ychwanegodd fod y peilot wedi "ymateb yn gywir a gyda chefnogaeth ei gydweithwyr, wedi sicrhau canlyniad diogel".

Fe ddigwyddodd y gwrthdrawiad wrth i'r awyrennau gloi'r sioe ddydd Sul yn Sir Ddinbych.

Roedd blaen yr awyren wedi ei ddifrodi ond ni chafodd y peilot ei anafu yn ôl swyddog

Wrth rannu neges ar Twitter, dywedodd y Red Arrows nad yw'r math o ddigwyddiad yn anghyffredin.

Ychwanegon bod peilotiaid wedi eu hyfforddi'n "arbennig o dda" ar ei gyfer.

"Yn yr achos hwn, ymatebodd Red 6 a'r tîm cyfan yn berffaith gyda'i gilydd, heb unrhyw risg pellach i'r peilot na'r awyren.

"Ry'n yn falch o ddweud bod y jet wedi glanio'n ddiogel a'r peilot heb ei anafu."