Y Bencampwriaeth: Abertawe 1-0 Queens Park Rangers
- Cyhoeddwyd
Mae Joël Piroe bellach wedi sgorio tair gwaith mewn tair gêm i'r Elyrch
Llwyddodd Abertawe i sicrhau eu buddugoliaeth gartref gyntaf o'r tymor brynhawn Sadwrn wrth iddyn nhw drechu Queens Park Rangers o 1-0.
Cafodd yr Elyrch gyfle euraidd i fynd ar y blaen ar ôl chwarter awr, wrth i Jimmy Dunne lawio'r bêl yn y cwrt cosbi gan arwain at gic o'r smotyn i'r tîm cartref.
Llwyddodd y golwr Seny Dieng i arbed ergyd Joël Piroe o 12 llath, ond o fewn munudau roedd Piroe wedi gwneud yn iawn am hynny trwy sgorio unig gôl y gêm yn dilyn gwaith da gan Ollie Cooper.
Mae'r canlyniad yn gweld yr Elyrch yn codi i'r 17eg safle yn y Bencampwriaeth wedi wyth gêm.