Cwymp bychan i 9.9% yn y gyfradd chwyddiant

Cwymp ym mhrisiau petrol a diesel oedd y prif reswm dros leddfu'r raddfa chwyddiant

Mae cyfradd chwyddiant y DU wedi lleddfu ychydig, er bod prisiau'n dal i godi ar eu cyfradd gyflymaf ers bron i 40 mlynedd.

Bu gostyniad mewn chwyddiant - y mesur o godiadau pris - i 9.9% yn y 12 mis hyd at fis Awst, i lawr o 10.1% yng Ngorffennaf, meddai'r Swyddfa Ystadegau Gwladol.

Mae costau byw cynyddol yn cael effaith ar gyllidebau cartrefi, gyda phrisiau'n codi'n gyflymach na chyflogau, ac mae Banc Lloegr wedi dweud y gall chwyddiant gyrraedd hyd at 13% eleni.

Cwymp ym mhrisiau petrol a diesel oedd y prif reswm dros leddfu'r raddfa chwyddiant, wedi i bris cyfartalog petrol syrthio o 14.3c y litr rhwng Gorffennaf ac Awst.

Mae prisiau tanwydd wedi bod yn cynyddu oherwydd y rhyfel yn Wcráin, a'r dyhead i leihau dibyniaeth Ewrop ar olew Rwsia.

Ond mae costau cyfanwerthu wedi gostwng, ar ôl i ofnau am ddirwasgiad yn yr Unol Daleithiau gilio oherwydd y galw am olew.