Rhybudd melyn am rew yn dod i rym brynhawn Mercher

Yn ôl y rhybudd diweddaraf, bydd siroedd y de ddwyrain yn osgoi'r amodau mwyaf rhewllyd

Mae'r Swyddfa Dywydd wedi diweddaru rhybudd melyn am rew yng Nghymru wrth i'r tymheredd ostwng.

Bydd y rhybudd bellach yn dod i rym yn gynt na'r disgwyl yn wreiddiol - am 17:00 brynhawn Mercher - ac yn para tan 18:00 ddydd Iau.

Fe allai'r amodau arwain at anafiadau wrth i bobl lithro neu syrthio.

Mae hefyd disgwyl trafferthion i deithwyr - gydag ambell fan o bosib yn rhewllyd ar ffyrdd, palmentydd a llwybrau seiclo sydd heb eu trin.

Mae cawodydd eira hefyd yn bosib ar dir uchel yn ystod y dydd wrth iddyn nhw symud o Ogledd Iwerddon tua chanolbarth Lloegr.

Roedd y rhybudd gwreiddiol ar gyfer Cymru gyfan ond mae bellach yn berthnasol i 12 o siroedd yn unig:

• Abertawe

• Caerfyrddin

• Castell-nedd Port Talbot

• Ceredigion

• Conwy

• Dinbych

• Gwynedd

• Penfro

• Powys

• Wrecsam

• Y Fflint

• Ynys Môn

Gyda'r disgwyl i'r tymheredd ostwng dan y rhewbwynt yr wythnos hon mae Dŵr Cymru yn cynghori pobl i gymryd camau i warchod eu cartrefi rhag i bibellau rewi a byrstio.

Maen nhw'n rhybuddio sut y gallai ymatal rhag rhoi'r gwres ymlaen, er mwyn arbed arian yn ystod yr argyfwng costau byw, gynyddu'r risg o bibellau'n rhewi.

Maen nhw annog cwsmeriaid i insiwleiddio pibellau, yn enwedig rhai sydd tu allan neu mewn llefydd heb wres, fel yr atig neu'r garej.