'Gobeithio adfer cyflenwad dŵr pawb erbyn bore Mercher'

Mae Dŵr Cymru'n dweud eu bod yn gobeithio y bydd cyflenwadau dŵr pawb o'u cwsmeriaid wedi'i adfer erbyn bore Mercher, yn dilyn trafferthion gyda phibellau.

Daw hynny wedi i filoedd o dai yn y gorllewin a'r canolbarth fod heb gyflenwad dŵr ers y penwythnos, ar ôl i'r tywydd rhewllyd achosi difrod i bibellau.

Yn y cyfamser mae cwsmeriaid wedi cael cynnig dŵr potel, a chanolfannau darparu dŵr potel hefyd wedi eu sefydlu yn Eglwys St Tysul, Llandysul, a Mart Castellnewydd Emlyn.

Mae Dŵr Cymru wedi ymddiheuro am y trafferthion, gan ddweud bod adfer y cyflenwadau'n profi'n "her fawr iawn", gyda phrif weithredwr y cwmni yn dweud bod 500 o bobl yn gweithio ar ail-sefydlu'r cyflenwad.

Ychwanegodd Peter Perry bod "dwy fil i ddwy fil a hanner" o gwsmeriaid yn parhau i gael eu heffeithio ond byddai staff yn gweithio drwy'r nos a dylai'r "mwyafrif" weld eu cyflenwad yn cael ei adfer "dros nos ac mewn i ddydd Mercher".

Yn ol Dŵr Cymru mae nhw eisoes wedi adfer cyflenwad 1,500 o gartrefi.

Blaenoriaethu dŵr potel

Mae Dŵr Cymru wedi bod yn delio â phrif bibellau dŵr sydd wedi byrstio yn ardaloedd Efailwen a Chlunderwen yn Sir Benfro, a Hendy-gwyn ar Daf yn Sir Gaerfyrddin.

Roedd adroddiadau o broblemau tebyg yn ardaloedd Glanyfferi a Chydweli hefyd, gyda rhai cartrefi yn ardaloedd Llandysul ac Aberteifi wedi bod heb ddŵr ers dydd Sadwrn.

Dywedodd Dŵr Cymru fod tair gwaith y nifer arferol o ollyngiadau wedi digwydd ar eu rhwydwaith dros y dyddiau diwethaf, ac felly nad oes digon o ddŵr ar gyfer pobl yr ardal nes y bydd y rheiny wedi eu trwsio.

Ers ddydd Gwener mae'r cwmni'n dweud eu bod wedi dosbarthu 50,000 o boteli dŵr, ond oherwydd prinder maen nhw nawr bellach ond yn eu rhoi i gwsmeriaid sydd angen blaenoriaeth am resymau meddygol.

"Yn anffodus allwn ni ddim dosbarthu'n fwy eang [na hynny], ac rydym yn eich annog i gysylltu gyda theulu, ffrindiau a chymdogion am gymorth," meddai Dŵr Cymru mewn diweddariad brynhawn ddydd Mawrth.

"Rydyn ni hefyd yn eich annog i gynnig cymorth i gymdogion a'ch cymuned ehangach os oes modd i chi wneud."

Mae gorsafoedd dŵr symudol hefyd wedi bod yn cael eu darparu mewn rhai ardaloedd

Mewn datganiad nos Fawrth dywedodd Dŵr Cymru eu bod bellach wedi trwsio dros 100 o ollyngiadau ac adfer cyflenwad i "tua 1,500 eiddo".

Dyw'r cwmni heb fanylu ar faint o gartrefi sy'n parhau heb gyflenwad.

"Hoffem ymddiheuro am yr anghyfleustra parhaus y mae cwsmeriaid yn yr ardal yn ei brofi oherwydd dim dŵr neu bwysedd dŵr isel," meddai'r datganiad.

"Gwnaethom gynnydd da neithiwr a thrwy heddiw gyda chanfod a thrwsio dros 100 o ollyngiadau... ac rydym bellach wedi adfer cyflenwadau i tua 1,500 eiddo.

"Disgwyliwn i weddill y cyflenwadau yr effeithir arnynt ddychwelyd dros nos.

"Dylem, fodd bynnag, dynnu sylw at y ffaith, wrth i'r lefelau yn y system ddychwelyd i normal, bod risg y bydd 'cloeon' aer yn datblygu a allai aflonyddu ar gyflenwadau dros dro."

Dywedodd Peter Perry dylai'r "mwyafrif" weld eu cyflenwad yn cael ei adfer "dros nos ac mewn i ddydd Mercher"

Yn siarad ar Wales Today dywedodd y prif weithredwr, Peter Perry, bod "pob ymdrech" yn cael ei wneud i ddatrys y broblem, gyda phum cant o bobl yn gweithio drwy'r nos i adfer y cyflenwad.

Ond cyfaddefodd Mr Perry hefyd fod problemau gyda danfoniadau dŵr potel ac bod "gwersi i'w dysgu", gydag adolygiad "trylwyr" i'w gynal ar ôl y digwyddiad.

'Ni wedi gorfod canslo'r lot'

Ym mwyty McCowans yn Aberaeron mae'r cyflenwad dŵr wedi bod yn gymysg iawn dros y dyddiau diwethaf - ymlaen weithiau ac yna i ffwrdd heb rybudd.

Roedd y caffi wedi paratoi bwyd cyn i'r dŵr fynd i ffwrdd, ac felly wedi agor ddydd Mawrth heb ddŵr er mwyn atal y bwyd rhag mynd yn wastraff.

"Wythnos 'ma o'n ni'n llawn - fully booked - partis Nadolig bob dydd, a ni wedi gorfod canslo'r lot," meddai'r perchennog Clare Cowan.

"Ni wedi gorfod prynu'r stoc yn barod, so ma' fe'n gostus dros ben.

"Ni'n gorfod gwneud y penderfyniad heno ydyn ni'n mynd i ganslo popeth at ddiwedd yr wythnos, neu ydyn ni'n mynd i gymryd y risg a dechrau pobi a chwcio? Ma' fe'n reallyanodd."

Gyda hyd yn oed cyflenwadau poteli dŵr yn isel bellach, mae 'na flaenoriaeth i'r rheiny sydd wir ei angen

Yn ogystal â'r pryder am yr effaith ar ei busnes, mae Ms McCowan yn poeni am unigolion bregus yn y gymuned.

"Mae'r sefyllfa'n really wael. Mae 'na bobl sy'n byw ben eu hunain - methu dod mas o'r tŷ. Mae sôn bod pobl heb hyd yn oed cael neges i ddweud bod dim dŵr.

"Mae'n hala ti i fecso. Mae cwpl o bobl ni'n 'nabod sy' ben eu hunain. Be os dyw rhywun ddim yn dod i checkio sut maen nhw?

"Falle bod pobl allan 'na yng Ngheredigion ar hyn o bryd sydd wedi bod heb ddŵr ers sawl diwrnod, a falle bod neb hyd yn oed yn gwybod bo' nhw 'na."

'Gwell cyfathrebu'

Wrth siarad ar raglen Dros Frecwast BBC Radio Cymru fore Mawrth dywedodd AS Ceredigion, Ben Lake y dylai Dŵr Cymru fod wedi cyfathrebu â thrigolion y sir yn well.

"Pe bai wedi bod yn bosib cael mwy o amserlen byddai wedi helpu pobl i gynllunio," meddai.

"Nawr rwy'n deall bod natur y gwaith a graddfa'r broblem yn ei gwneud hi'n anodd i roi amser penodol pendant, ond byddai gwell cyfathrebu o'r cychwyn wedi bod yn help a byddai pobl ar draws y sir wedi croesawu hynny dwi'n siŵr."