'Fydden i byth yn disgwyl i Dad fynd ar goll fel hyn'

Mae teulu Aled Glynne Davies wedi gwneud apêl ar i bobl edrych am unrhyw recordiad fideo posib ohono cyn iddo fynd ar goll.

Fe gafodd Mr Davies, cyn-olygydd BBC Radio Cymru, ei weld ddiwethaf yn ardal Pontcanna, Caerdydd nos Sadwrn, 31 Rhagfyr.

Mewn apêl emosiynol am wybodaeth ddydd Mawrth, dywedodd ei fab Gruffudd Glyn fod ei dad mewn cyflwr iechyd bregus.

Mae'n hanfodol, meddai, dod o hyd i glip fideo ohono yn cerdded ar noson ei ddiflaniad.

Mae Aled Glynne Davies ar feddyginiaethau oherwydd cyflwr ar ei ysgyfaint

"'Sen i byth yn disgwyl i Dad fynd ar goll fel hyn" meddai. "Oedd o ar droed - oedd o ddim mewn car.

"Mae'n rhaid i ni gael clip ohono fo, ar CCTV personol pobl, busnesau pobl, dashcam ceir pobl a chlychau drysau.

"Alla'i ddim pwysleisio pa mor bwysig yw hi i gael unrhyw sighting o Dad."

Dywed teulu Aled Glynne Davies ei fod yn gwisgo'r gôt werdd yma pan gafodd ei weld ddiwethaf

Mae Mr Davies ar feddyginiaethau oherwydd cyflwr ar ei ysgyfaint.

Dywedodd ei fab bod ymateb pobl leol fu'n helpu yn chwilio wedi bod yn "anhygoel".

Yn ôl ei deulu, fe gerddodd Mr Davies, sy'n 65 oed, a'i wraig yn ôl i'w tŷ ym Mhontcanna ar ôl gadael bwyty Uisce am 22:36 nos Sadwrn.

Ar ôl cyrraedd adref, fe adawodd ei dŷ i fynd am dro ar ei ben ei hun.

Roedd yn gwisgo cot werdd dywyll, sbectol, a het werdd a brown tywyll, fel sydd wedi eu rhannu mewn llun gan y teulu ar y cyfryngau cymdeithasol.

Dywed Gruffudd fod hi'n hollbwysig dod o hyd i glip fideo o'i dad Aled Glynne Davies (chwith)

Mae'r heddlu a'r teulu hefyd yn annog i bobl chwilio mewn eglwysi neu adeiladau tu allan.

"'Di o ddim yn licio oerni, mae'n oeri yn hawdd," meddai Gruffudd.

"Er bod o'n swnio'n wirion - sieciwch eich tai, eich gerddi, sieds unrhyw beth, tarpaulin unrhyw beth - lle posib [y gallai] Dad wedi meddwl 'dwi angen cysgu, neu dwi angen cynhesu fan hyn'."